Son günlər Rusiya və Qərb KİV-lərində Rusiyanın ATƏT-in Minsk Qrupundan yan keçərək Qarabağ üzrə “gizli plan” həyata keçirməsinə cəhd edəcəyinə dair məlumatlar dərc edilir.

Məlumatlarda vurğulanır ki, Putin bu planı Avropa Oyunlarının açılış mərasimi ilə əlaqədar Bakıya səfəri zamanı İlham Əliyevlə müzakirə edib. Bir neçə gün əvvəl isə planın detallarını müzakirə etmək məqsədilə Rusiyanın xarici işlər naziri Sergey Lavrov Bakıya səfər edib.

AzVision.az xəbər verir ki, bu barədə “Lragir.am” saytının baş redaktoru Aykazn Qaqiryan Rusiyanın Qarabağla bağlı “Gizli planı” adlı məqaləsində qeyd edib.

Qaqiryanın fikrincə, Lavrovun Bakı səfəri cəbhədə gərginliyin kəskinləşməsi fonunda baş verib ki, bu da Rusiyanın “strateji tərəfdaşı” olan Ermənistana bir mesajıdır.

“Əgər Moskva istəməsəydi, onda Azərbaycan Ermənistanı atəşə tutmazdı. Bu, hamıya aydındır. Hazırda müstəqil siyasət yürütməyə cəhd edən Azərbaycan uğrunda ciddi mübarizə gedir. Ermənistan və Gürcüstan məsələsində hər şey aydındır, yalnız Azərbaycan qalır. Rusiya Azərbaycanın Avrasiya İqtisadi İttifaqına (Aİİ) üzv olmasını istəyir ki, bu da Qarabağ məsələsini Ermənistanla “ümumi sərhədlər” kontekstində həll etməyə imkan verəcək. Ermənistan Rusiyanın baş ağrısıdır. Belə ki, onun rəhbərliyinin və siyasi güclərinin Rusiyaya tabe olmasına baxmayaraq, Ermənistan hər an gözlənilməz addım ata bilər. Belə bir problemin səbəblərindən biri kimi Rusiya və Ermənistanın ortaq sərhədinin olmaması və maraqların açıq şəkildə üst-üstə düşməməsidir”, - deyə müəllifi vurğulayıb.

Jurnalistin fikrincə, Rusiya bu planın həyata keçirilməsi üçün hətta güzəştlərə - Ermənistanın maraqlarını qurban verməyə də hazırdır: “Azərbaycan Ermənistandan fərqli olaraq Avrasiya ölkəsidir və Rusiyadan iqtisadi və siyasi imtiyazlar alır. Lakin indi Rusiya elə vəziyyətdədir ki, Bakı ondan artığını tələb edə bilər.

Azərbaycan uğrunda mübarizə regionda ABŞ və NATO-nun aktivliyi fonunda daha da artır. Məsələn, ABŞ Qarabağ nizamlanması üzrə danışıqlarda dominantlığı ələ alıb, NATO isə artıq Gürcüstanda möhkəmlənib. Bu şərtlər altında Rusiya Azərbaycanla münasibətlərdə güzəştlərə getməyə hazırdır. Çünki onun bundan başqa təsir rıçaqları yoxdur.

Əbəs yerə deyil ki, beynəlxalq KİV-də Moskvanın Qarabağ torpaqlarını Azərbaycana geri qaytarmağa hazır olduğuna dair məlumatlar dərc olunmur. Vurğulanır ki, sentyabrın 7-i Serj Sarkisyanla görüş zamanı Putin ona belə bir təklif edə bilər”.

Məqalə müəllifi vurğulayır ki, Azərbaycan tərəfi Serj Sarkisyanın Moskvaya səfəri ərəfəsində genişmiqyaslı hərbi təlimlərə başlayıb: “Bir çox ekspertlər vurğulayır ki, rəsmi Bakının son günlər aktivliyi Rusiya-Azərbaycan razılaşmasının əldə olunması ilə bağlı Ermənistana təzyiqin göstərilməsinə hədəflənib.

Eldar Tanrıverdiyev
AzVision.az