AzVision.az bildirir ki, Amerikanın “Axios” nəşri jurnalist Barak Ravidin İsrail rəsmilərinə istinadən verdiyi xəbərdə Netanyahunun köməkçilərindən birinin gizli kəşfiyyat məlumatlarının sızması iddiası ilə bağlı saxlanılan bir neçə şübhəli arasında olduğunu yazıb. Məqalə müəllifinin fikrincə, bu, Qəzzada müharibə başlayandan bəri İsrail hökumətində böyük qalmaqala çevrilə bilər.

“Əsas sual, Netanyahunun İsrail ictimai rəyinə təsir göstərmək və HƏMAS-ın girovlarının azad edilməsinə dair razılaşmaya dair baş nazirin sərt mövqeyini dəstəkləmək məqsədi daşıyan sızmalardan xəbəri olub-olmamasıdır”, - jurnalsit yazır.

“NEWSru.co.il” portalı bildirir ki, İsrail Müdafiə Qüvvələri (ÇAXAL) bir neçə həftə əvvəl Almaniyanın “Bild” tabloidinə çox məxfi kəşfiyyat sənədinin sızmasından sonra ümumi təhlükəsizlik xidmətinə (Şin Bet) təhqiqat açılmasını istəyib. Bu kontekstdə, sentyabr ayında ÇAXAL “mahiyyəti dəyişdirilmiş” HƏMAS sənədlərinin Qərb mediasına sızması ilə bağlı daxili təhqiqata başlayıb: ÇAXAL bu dəyişikliklərin qəsdən ictimai rəylə manipulyasiya aparmaq və girovların azad olunması ilə bağlı sövdələşmənin təbliği üçün edildiyindən şübhələnir.

Bu sənədlərdən birini dərc edən Almaniyanın “Bild” nəşrinin iddiasına görə, bu HƏMAS-ın lideri Yəhya Sinvarın şəxsi kompüterində tapılan və təşkilatın İsraillə sövdələşmə ilə bağlı strategiyasına aid olan məxfi sənəddir. Lakin ÇAXAL-dakı mənbələr bunun HƏMAS-ın kiçik vəzifəli rəsmisinə aid olduğunu və sənəddə HƏMAS-ın İsraillə razılaşmada maraqlı olmadığına dair heç bir əlamətin tapılmadığını iddia edib

Nazirlər kabinetinin iclasında “Bild” nəşrinin adını çəkən Benyamin Netanyahu HƏMAS-ın nəşrə təqdim etdiyi strategiyası haqqında iddiadan sitat gətirib.

“Ötən həftənin sonunda Almaniyanın “Bild” nəşri HƏMAS-ın daxili sənədini dərc edərək terrorçuların planını açıqlayıb: israillilər arasında parçalanma toxumu səpmək, girov ailələri psixoloji müharibəyə cəlb etmək, İsrail hökumətinə xarici və daxili təzyiqlər yaratmaq, cəmiyyətimizi parçalamaq. içəridən və İsrail üzərində qələbəyə qədər müharibə aparın”, - Benyamin Netanyahu həmin sənədin strategiyasını diqqətə çatdırıb.

Şin Bet sızma faktını araşdırmağa başladıqdan sonra bir neçə şübhəli saxlanılıb. Amma “Axios”un iddiasına rəğmən, Netanyahu onun öz ofisində kiminsə qalmaqala qarışdığını inkar edib. O bildirib ki, ofisindən heç kim dindirilməyib və saxlanılmayıb. Bununla belə, “Axios”un istinad etdiyi rəsmilər saxlanılanlar arasında İsrail hökuməti başçısının köməkçilərindən birinin də olduğunda israrlıdırlar.

“The Times of Israel” qəzetinin yazdığına görə, İsrailin kəşfiyyat xidmətləri ölkənin baş nazirinin ofisindən məxfi kəşfiyyat məlumatlarının sızması ilə bağlı bir neçə şübhəlini saxlayıb. İddia edilir ki, birgə əməliyyatı polis, ordu və İsrail Baş Təhlükəsizlik Xidməti həyata keçirir. Şübhəlilər saxlanılaraq istintaqa aparılıb. Səlahiyyətli məmurların fikrincə, məxfi sənədlərin sızıntısı İsrailin hərbi məqsədlərinə çatmasına mane ola bilərdi.

Sahil İsgəndərov
AzVision.az