APA-nın Rusiya mətbuatına istinadən xəbərinə görə, aparılan əməliyyat-axtarış tədbirləri nəticəsində Azərbaycan hüquq-mühafizə orqanları tərəfindən fırıldaqçılıqda təqsirləndirilən Azərbaycan vətəndaşı yaxalanıb.

O, özünü vəzifəli şəxs kimi təqdim edərək, vətəndaşlara müəyyən məbləğ qarşılığında zəlzələdən zərər çəkən evlərin bərpası üçün zəruri sənədlərin alınmasına kömək edəcəyini vəd edib və ona inanan şəxslərin 58 min dollarını alaraq mənimsəyib. O, cinayət məsuliyyətindən yayınmaq üçün 2013-cü ilin sentyabrında Azərbaycanı tərk edib və Rusiya ərazisində gizlənib. 2014-cü ilin may ayında İnterpolun Baş Katibliyi onun həbsinə və axtarışa verilməsinin təşəbbüskarı olan dövlətə ekstradisiyasına qərar verib. Aparılan əməliyyat-axtarış tədbirləri nəticəsində onun yeri müəyyənləşdirilib və həbs edilib.

Bir sıra cinayətlərdə təqsirləndirilən digər Azərbaycan vətəndaşı isə Ufa hüquq-mühafizə orqanlarının əməkdaşları tərəfindən həbs edilib. Təqsirləndirilən şəxs 2009-2012-ci illərdə sənədləri saxtalaşdırmaq yolu ilə banklardan külli miqdarda kredit götürüb və qaytarmayıb. O, mənimsədiyi vəsaitlə Rusiyadakı qohumlarının yanına gedib, Tümen vilayətində olub və Başqırdıstanda saxlanılıb.

Azərbaycan hüquq-mühafizə orqanları hər iki şəxsin həbsi haqqında məlumatlandırılıb. Hazırda onların ekstradisiyası məsələsi həll olunur.

Bundan başqa, Azərbaycan hüquq-mühafizə orqanlarının əməkdaşları Bakı aeroportunda külli miqdarda narkotik qaçaqmalçılığında təqsirləndirilən Tümen sakinini həbs edib. Hazırda onun Rusiyaya ekstradisiyası məsələsinə baxılır.