AzVision.az Azərtac-a istinadla xəbər verir ki, Dubay Ali Energetika Şurasının sədr müavini və Ümumdünya Yaşıl İqtisadiyyat Təşkilatının (WGEO) sədri Said Mohammed Al Tayir çıxışında bildirib ki, Ümumdünya Yaşıl İqtisadiyyat Sammiti qlobal miqyasda yaşıl iqtisadiyyatı inkişaf etdirməyə həsr olunmuş ən qabaqcıl qlobal platformalardan birinə çevrilib.

Artıq 10-cusu keçirilən bu mötəbər tədbirin yaşıl iqtisadiyyat sahəsində qlobal əməkdaşlığa töhfə verdiyini qeyd edən Al Tayir qeyd edib ki, builki sammit Dubay və BƏƏ-nin iqtisadi artımın və ətraf mühitin qorunmasının tarazlaşdırılmasında, bərpaolunan və təmiz enerji həllərinə investisiyaların
genişləndirilməsində qabaqcıl səylərini nümayiş etdirmək üçün bir fürsətdir. Sammit keçən il BƏƏ-nin Dubayda ev sahibliyi etdiyi COP28-in qərarlarına əsaslanır.

Ümumdünya Yaşıl İqtisadiyyat Təşkilatının sədri qeyd edib ki, WGES sessiyalarında əsas çıxışlar noyabr ayında Azərbaycanda keçiriləcək COP29 üçün zəmin yaratmağa töhfə verib. Bu, WGES-in davamlılıq və yaşıl iqtisadiyyat sahələrində dünya ölkələri arasında dialoqu və əməkdaşlığı inkişaf etdirmək səylərinin bir hissəsidir.

BƏƏ-nin sənaye və qabaqcıl texnologiyalar naziri və COP28-in prezidenti Sultan bin Əhməd Əl Cabir bildirib ki, COP28 keçən il BƏƏ-nin tarixi Konsensusunu çatdırmaq üçün dünyanı bir araya gətirdi, həmçinin qlobal iqlim ambisiyaları və davamlı inkişaf üçün müəyyən istinad nöqtəsi oldu. “İqlimlə bağlı hərəkətlər çox vaxt xalqlar üçün bir yük kimi görünsə də, biz hekayəni dəyişdirməyə, onu inkişaf və innovasiya üçün tarixi bir fürsət kimi təqdim etməyə başladıq. Yaşıl iqtisadiyyata keçid bizə iqtisadi artım tempini sürətləndirməyə, yeni iş yerləri yaratmağa və hamı üçün davamlı rifah təmin etməyə imkan verəcək”,-deyə nazir vurğulayıb.

Əmirliklərin energetika və infrastruktur naziri Suheyl bin Mohammed Al Mazrui çıxışında qeyd edib ki, təmiz enerji güclü yaşıl iqtisadiyyat qurmaq üçün əsas tələbdir. O əlavə edib: “Beləliklə, biz BƏƏ-nin 2050-ci ilədək Enerji Strategiyasını daha yüksək və iddialı hədəflərlə yenilədik. Bunlara 2030-cu ilə qədər bərpaolunan enerji gücümüzü üç dəfə artırmaq, təmiz enerji gücümüzü 2030-cu ilə qədər 19,8 GVt-a çatdırmaq və 2030-cu ilə qədər quraşdırılmış təmiz enerji tutumunun payını 30 faizə çatdırmaq daxildir. Biz, həmçinin 1,4 milyon ton aşağı enerji istehsalını nəzərdə tutan Milli Hidrogen Strategiyasını işə saldıq”.

BƏƏ-nin beynəlxalq əməkdaşlıq üzrə dövlət naziri Reim Al Haşimi xalis sıfır emissiya hədəfinə çatmağın vacibliyi qeyd edib. O, COP28-də insanların və müəssisələrin ehtiyaclarını tarazlayan canlı icma yaradıldığını diqqətə çatdırıb və vurğulayıb ki, ölkəsi Bakıda keçiriləcək COP29 konfransında da bu istiqamətdə yeni təşəbbüslərə qoşulacaq.

AzVision.az