Bu barədə “New York Times” öz mənbələrinə istinadla bildirib. ABŞ-nin Priqojin in planlarından ilk dəfə nə vaxt xəbər tutduğu dəqiq bilinmir. Amma çərşənbə günü kəşfiyyat rəsmiləri prezident administrasiyasının və müdafiə departamentinin nümayəndələri ilə brifinqlər keçiriblər. Cümə axşamı günü, daha çox dəlil əldə olunandan sonra, kəşfiyyat rəsmiləri Konqres liderlərindən ibarət kiçik bir qrupa məlumat veriblər.

Mənbədən bildirilib ki, kəşfiyyat xidmətləri Priqojinin hərbi əməliyyatlarının nəticəsinin necə olacağı barədə proqnoz verə bilməyiblər, lakin bunun Rusiyanın nüvə silahı arsenalına nəzarətə necə təsir edə biləcəyindən narahat olublar.

Qəzet xatırladır ki, ABŞ Prezidenti Cozef Bayden ötən ilin oktyabrında Vladimir Putinin özünü küncə sıxışdırılmış hiss edəcəyi təqdirdə yarada biləcəyi təhlükədən danışmışdı.

Rusiyanı qarışdıran Priqojin: Əvvəl sendviç satdı, sonra Putinin aşpazı oldu

Xatırladaq ki, iyunun 23-də Priqojin Rusiyanın hərbi rəhbərliyini “Vaqner” düşərgələrinə hücumda və döyüşçüləri öldürməkdə günahlandırdı, buna cavab verəcəyini vəd etdi. Müdafiə Nazirliyi bu məlumatı təkzib edərək, təxribat kimi qiymətləndirdi.

Ertəsi gün səhər Priqojin Rostovdakı və Voronejdəki hərbi obyektlərə nəzarəti və ÖHŞ döyüşçülərinin Moskvaya getmək niyyətini açıqladı. Amma axşam saatlarında bu planlarından əl çəkdi. Bundan əvvəl Minsk Priqojinin Belarus Prezidenti Aleksandr Lukaşenko ilə danışıqları haqqında məlumat verdi.

Bildirildi ki, danışıqlar zamanı ÖHŞ döyüşçüləri üçün təhlükəsizlik zəmanəti ilə razılıq əldə edilib. Kremldən onların məsuliyyətə cəlb edilməyəcəyi, Priqojinə qarşı silahlı qiyamın təşkili ilə bağlı (Cinayət Məcəlləsinin 279-cu maddəsi) cinayət işinə xitam veriləcəyi və onun Belarusa gedə biləcəyi vədi verildi.

AzVision.az