Bu barədə Reuters agentliyi məlumat verib. Qeyd olunub ki, 59 yaşlı Kiril Buyanovski və 55 yaşlı Duqlas Robertsona qarşı Kanzas ştatının ABŞ Dairə Məhkəməsi tərəfindən Rusiya istehsalı olan təyyarələri idarə edən bütün dünya üzrə müştərilərə avionika satmaqla ABŞ ixrac qanunlarını pozmaq ittihamı irəli sürülüb. Bu şəxslər texnoloji avadanlıqları təmir edilmiş cihazlar adı ilə və son təyinat yerini Almaniya göstərməklə, saxta hesab-faktura təqdim ediblər. 2022-ci il fevralın sonunda hüquq-mühafizə orqanları avionik yükü saxladıqdan sonra ABŞ Ticarət Departamenti lisenziya tələb edib. ABŞ Ədliyyə Departamentinin bəyanatında deyilir: “Kiril Buyanovski və Duqlas Robertson 2022-ci ilin may, iyun və iyul aylarında qeyri-qanuni olaraq elektronikanı Ermənistan və Kipr vasitəsilə daşıyıblar”.

Müttəhimlər, həmçinin sui-qəsddə, nəzarət edilən malları lisenziyasız ixrac etməkdə, ixrac məlumatlarını saxtalaşdırmaqda və təqdim etməməkdə, ABŞ qanunlarına zidd olaraq qaçaqmalçılıqda ittiham olunurlar. Təqsirləri sübuta yetirilərsə, onları qaçaqmalçılıqda hər bir fakta görə 20 ilə qədər həbs cəzası gözləyir.

Qeyd edək ki, avionikaya təyyarələrdə quraşdırılmış rabitə, naviqasiya, uçuşa nəzarət və təhlükənin aşkarlanması sistemləri daxildir. ABŞ Ticarət Departamentinin rəsmisi Metyu Akselrod Mayamidə Amerika Hüquqşünaslar Assosiasiyasının tədbirində həbslər barədə məlumat verib.

Rusiyanın keçən il Ukraynaya müdaxiləsindən sonra ABŞ, Rusiyanın müdafiə, aerokosmik və dəniz sektorlarını hədəf alan digər mallara nəzarətlə yanaşı, avionikaya əlavə məhdudiyyətlər qoyub. Nəzarət daha sonra Rusiyanın neft emalı, sənaye və ticarət sektorlarını və lüks malları əhatə edəcək şəkildə genişləndirilib.

AzVision.az