Bu gün isə Ermənistanın məşhur "Hraparak" nəşri etnik ermənilərdən görüşə qatılanlarla bağlı diqqət çəkən informasiyalar yayıb.

Qəzet xatırladıb ki, bu, Rusiya sülhməramlılarının Qarabağdakı qərargahında baş tutan ilk görüş deyil. Etnik erməniləri isə Samvel Şahramanyanla Sergey Martirosyan təmsil edib. Vitali Balasanyanın "Təhlükəsizlik Şurası"nın katibi olduğu dövrdə görüşlərdə həmişə o iştirak edib.

Müəllif Martirosyanın sülhməramlı qüvvələrin keçmiş rəhbəri, məşhur general Muradova yaxınlığı ilə seçilməsinə diqqət çəkib.

Azərbaycan rəsmiləri Qarabağın erməni icması ilə görüşdülər

"Onlar əvvəllər Rusiya ordusunda birlikdə xidmət ediblər. Üstəlik, Martirosyanın oğlu 44 günlük müharibədə itkin düşənlər siyahısındadır. Həmçinin, Sergey Rusiya sülhməramlıları ilə birgə aparılan axtarış əməliyyatlarında fəal iştirak edib. Bunun sayəsində onların münasibətləri daha da sıxlaşıb. Qeyd edək ki, danışıqlara qatılanlar arasında, görüşdə üçüncü şəxs də olub. Lakin fotoda yalnız onun əlinin kiçik bir hissəsi görünür. Xankəndidəki mənbələrimiz isə görüşdə “Dəmirli” mədəninin (ermənilər Kaşen adlandırır-red.) sahibinin də iştirak etdiyini istisna etmirlər",- məqalədə yazılıb.

Xatırladaq ki, görüşdə Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət təbii sərvətlərin qanunsuz istismarını araşdıran monitorinq qrupunun rəhbəri Məsim Məmmədov da iştirak edib.

Görüş zamanı Azərbaycan Respublikasının Konstitusiyasına və qanunlarına uyğun olaraq Qarabağ bölgəsində yaşayan erməni sakinlərin Azərbaycan Respublikasına reinteqrasiyasına dair ilkin müzakirələr aparılıb.

Tural Tağıyev
AzVision.az