Azvision.az xəbər verir ki, Cəmiyyətin Xalq Yaradıcılığı Emalatxanasında cari ilin ötən dövründə 7 müdavim xalçaçılıq kursu keçərək, bədii və texniki iş üsullarını ­öyrənib. Müdavimlərə müvafiq sertifikatlar təqdim olunub. Həmçinin bu işlərin davamı olaraq Ordubad Texniki Peşə və Sürücülük məktəbində 12 müdavim xalçaçılıq kursunu başa vuraraq sertifikatla təltif olunub.

“Evdə qal, xalça toxu” devizi altında onlayn xalça yaradıcılıq müsabiqəsi elan edilməsi muxtar respublikada xalq yaradıcılığı sahələrinin inkişafı, kənd əhalisinin bu sənətə olan marağının artırılmasına səbəb olub.

Dövlət proqramının icrasına uyğun olaraq yaradılmış əllə toxunmuş xalçaların reyestrinə daxil edilmək üçün cari ilin 6 ayı ərzində 40 xalçanın pasportlaşdırılması ilə bağlı işlər həyata keçirilib.

Qeyd edək ki, “Naxçıvan Muxtar Respublikasında xalça sənətinin qorunmasına və inkişaf etdirilməsinə dair 2018-2022-ci illər üçün Dövlət Proqramı” milli xalçaçılıq ənənələrinin qorunmasına və gələcək nəsillərə ötürülməsinə, xalçaçılıq sənətinin gənc nəsil arasında təbliğ və inkişaf etdirilməsinə, xalça çeşnilərinin bərpasına, əllə toxunan xalçaların ixrac potensialının artırılmasına, eləcə də əhalinin məşğulluğunun təmin edilməsinə böyük təsir göstərib.

Azvision.az