Britaniyanın “İnternational Business Times” nəşri İŞİD-in İraq və Suriya ərazisinin bir hissəsində elan etdiyi “xilafətin” Azərbaycan da daxil olmaqla bir sıra ölkələrə yayılacağını göstərən xəritəni açıqladığını yazır.

Fələstin Azadlıq Təşkilatının keçmiş üzvü, hazırda özünü “İslam alimi” kimi təqdim edən İŞİD-in ideoloqlarından sayılan Valid Şoebat (Walid Shoebat) “xilafətin” ekspansionist planlarını əks etdirən xəritənin ingilis dilinə tərcümə edilmiş versiyasını yayıb. Orada göstərilir ki, Balkan ölkələri, İspaniya, Portuqaliya İŞİD-in uzunmüddətli hədəfləridir.

İŞİD İraqı (Kürdüstan da daxil olmaqla), Suriyanı və Livanı bütünlüklə nəzarət altına almağı özünün yaxın perspektiv üçün planlarına daxil edib. Bundan sonrakı mərhələdə isə İŞİD Türkiyəni, MDB ölkələrindən Azərbaycan, Qazaxıstan, Qırğızstan, Tacikistan və Özbəkistanı nəzarət altına almağı hədəfləyir. Bu ölkələr “xilafətdə” “Gogzaz” adı altında göstərilir.

İŞİD-in hazırladığı “qara xəritəyə” görə İran, Əfqanıstan, Pakistan və ola bilsin İndoneziya “xilafətin” “Xorasan” əyalətinə daxil olacaq. “Qinana” əyalətində isə Misir, Sudan, Somali kimi dövlətlər yer alacaq. Şimali Afrika ölkələrindən Liviya, Tunis, Əlcəzair, Mərakeş və Mavritaniya gələcək “xilafətdə” “Məğrib” kimi göstərilir.

Xəritə bundan əvvəl ərəb dilində yayılmışdı. Xatırladaq ki, bu gün İŞİD terrorçuları Rusiya prezidenti Vladimir Putini Bəşər Əsədə yardıma görə hədələyən mesaj yayımlayıb və həmin mesajda tezliklə bütün Qafqaza hücumun başlayacağı bildirilir. (virtualaz.org)