Son zamanlar əmək miqrantlarına qarşı qaydaların sərtləşdirildiyi Rusiyada əcnəbilərin bu ölkədəki hüquqi durumlarıyla bağlı daha bir qanun qəbul edilib. Əmək patentində peşəsini düzgün göstərməyən miqrantları böyük cəzalar gözləyir.

ANS TV-nin Moskva bürosunun məlumatına görə, Rusiya prezidenti Vladimir Putin xarici ölkə vətəndaşlarının Rusiyadakı hüquqi statuslarıyla bağlı yeni qanun imzalayıb. Buna görə əmək patentində göstərilən fəaliyyət nüvündən kənar işlə məşğul olan əcnəbilərin 100 dollar miqdarında cəzalandırılması və patentin ləğvi nəzərdə tutulur. Bundan sonra əmək miqrantları fəaliyyət sahələrini dəyişdikdə rəsmi məlumat verməlidirlər.

Rusiya Miqrantlar Federasiyasının prezidenti Muhammed Amin Madjumder isə yeni qanunun miqrantlara daha çox təzyiq göstərməkdən başqa heç bir məqsəd daşımadığını düşünür:

“Rusiya əmək miqrantlarını qəbul edəndə onların peşəsini əsas götürmür. O halda hansı əsasla belə bir qanun qəbul edildiyini anlamaq mümkün deyil. Belə çıxır ki, patentində peşəsi aşçı yazılan bir miqrant ofisiant işləsə, patentsiz qalacaq. Belələri isə deportasiya edilir. Bütün bu qanunlar miqrantları daha çox əzmək üçün qəbul edilir”.

Yeni qanun azərbaycanlı miqrantlara da təsirsiz ötüşməyəcək. Çalışmaq ücün patent almaqda onsuz da maraqı olmayan həmvətənlərimiz arasında qanunsuz çalışanların sayının daha da artacağı gözlənilir.

“Moskvada patent almaq çətinləşib. Birinci rus dilini bilməlisən, ikinci imtahan verməlisən və üçüncüsü bir firmayla əmək müqaviləsi imzalamalısan. Belə firma tapmaq isə demək olar ki, mümkün deyil. Ona görə mənim tanıdığım azərbaycanlıların əksəriyyəti patentsiz işləyirlər”, – deyə azərbaycanlı miqrant Səfər Abıyev bildirib.

Rəsmi rəqəmlərə görə, Rusiyada 2015-ci ilin ilk beş ayında əcnəbilərə 1 milyon əmək patenti verilib ki, bu da dövlət büdcəsinə 150 milyon dollar gəlir gətirib.