O, "Fox News"a müsahibəsində Ukrayna üçün bəzi təhlükəsizlik zəmanətlərinin məqbul ola biləcəyini deyib.

Dmitriev Ukraynanın Rusiyanın enerji obyektlərini hədəfə almasını xatırladıb. O, həmçinin Ağ Evdə aparılan danışıqlarda müsbət nəticənin olduğunu da söyləyib. Rusiya rəsmisi ilk dəfə olaraq Kremlin Kiyev üçün təhlükəsizlik zəmanətlərinə açıq ola biləcəyini etiraf etib. Buna qədər Rusiya Ukraynanın Qərbdən tələb etdiyi təhlükəsizlik zəmanətlərinin heç birini qəbul etmirdi.

Rusiya rəsmisi: "ABŞ ilə danışıqlardakı irəliləyiş yaxın aylarda mümkün olacaq"

Rusiya rəsmisinin Vladimir Putin və Donald Tramp arasında Ukrayna ilə bağlı danışıqlarda mühüm irəliləyişin əldə olunmasını bəyan etməsi də diqqət çəkib. O, Vaşinqtondakı danışıqlardan sonra Rusiya ilə ABŞ arasında yeni müzakirələrin tarixlərinin yaxın vaxtlarda müəyyənləşəcəyini deyib.

“Tramp administrasiyası Rusiya ilə dialoqda konstruktivdir. Tramp administrasiyası Rusiyanın mövqeyini eşidir", - o bildirib.

Dmitriyev hələ fevral ayında Ər-Riyadda jurnalistlərə demişdi ki, ABŞ ilə danışıqlarda irəliləyiş yaxın aylarda mümkün olacaq.

Xatırladaq ki, dünən Ukrayna prezidenti Volodimir Zelenski yaxın həftələrdə atəşkəslə bağlı razılığın əldə edilə biləcəyini deyib.

O, Çerniqov vilayətinin ərazi icmalarının nümayəndələri ilə görüşündə qeyd edib ki, razılığa mümkün qədər tez nail olmaq mümkündür: "Yaxın aylarda da ola bilər. Bəzən hər şey bir anda baş verir. Xüsusilə də müharibənin bu dönəmində qaynar fazada tam atəşkəs realdır".

Martın 18-də Rusiya və ABŞ prezidentləri Vladimir Putin və Donald Tramp telefonla Ukraynadakı vəziyyəti, gərginliyin qarşısının alınması şərtlərini və bir sıra beynəlxalq məsələləri müzakirə ediblər. Kremlin mətbuat xidmətinin məlumatına görə, Putin Amerika liderinin Ukraynadakı münaqişə tərəflərinin 30 gün ərzində enerji infrastrukturu obyektlərinə zərbələrdən qarşılıqlı imtina etməsi təklifi ilə razılaşıb.

Rusiya ilə Ukrayna arasındakı genişmiqyaslı müharibə 2022-ci ilin fevralın 24-də başlayıb. Moskva işğal zamanı qoşunları Kiyevə qədər apara bilsə də, sonradan müharibədə üstünlük nisbətən Ukraynanın tərəfinə keçdi. Ukrayna qoşunları ötən ilin iyunundan əks-hücum əməliyyatlarına başladılar. Amma bu da uğurlu olmadı. Ukrayna ordusu 2024-cü ildə gözlənilmədən Rusiyanın Kursk vilayətinə girdi. Son aylarda isə Rusiya yenidən döyüş meydanındakı vəziyyəti öz xeyrinə dəyişə bilib. Kurskun işğalda qalmış əraziləri yenidən geri qaytarılıb.

Tural Tağıyev
AzVision.az