ISW: “Rusiya böyük hücuma hazırlaşır”

ISW: “Rusiya böyük hücuma hazırlaşır”
  02 Aprel 2025    Oxunub:521
Donetsk bölgəsi yaxınlığında əhəmiyyətli dərəcədə üstün qüvvələr cəmləşdirmiş Rusiya genişmiqyaslı hücum planlaşdırır.
AzVision.az xəbər verir ki, Amerikanın Müharibənin Öyrənilməsi İnstitutunun (ISW) yeni hesabatında yaxın aylarda Borovaya və Limanın ələ keçirilməsi üçün şərait yaratmaq səyləri çərçivəsində Rusiya qoşunlarının sonuncunun şimal-şərqində tutduqları ərazini genişləndirdiyi vurğulanır.

“Rusiya komandanlığı Ukrayna qüvvələrini Jerebets çayının sol sahilindən sıxışdırmaq üçün “insan dalğaları” taktikasından istifadə edir. Eyni zamanda, mexanikləşdirilmiş hücumların olmaması texnologiya ilə bağlı problemlərdən xəbər verir. Novolyubovkadan şimal-qərbə doğru irəliləmiş Rus qüvvələri böyük ehtimalla bu yaşayış məntəqəsini işğal ediblər. Novoye qəsəbəsindən cənub-şərq istiqamətində irəliləmə də təsdiqlənib”, - institutun ekspertləri bildirir.

Eyni zamanda, Ukrayna mənbələri rus qoşunlarının Katerinovkanın cənub kənarına hərəkəti barədə məlumat verir. İlin əvvəlindən Rusiya piyadaların hücumlarını artırıb, lakin zirehli texnikadan nadir hallarda istifadə edir.

ISW-nin məlumatına görə, cəbhənin müəyyən sektorlarında qüvvələrin nisbəti Rusiyanın xeyrinə 10:1-ə çatır. İrəliləyən birləşmələrin əsasını 144-cü və 3-cü motoatıcı diviziyaları təşkil edir. Eyni zamanda, rus qoşunları bölmələri rotasiya üçün geri çəkmədən itkilərin yerini aktiv şəkildə doldurur.

- Rusiya Limanın şimal-şərqində tutduqları ərazidən istifadə edərək Luqansk vilayətinin Ukraynanın nəzarətində qalan hissəsini ələ keçirə bilər. Bu, Moskvanın mümkün danışıqlarda mövqeyini gücləndirməsi üçün zəruridir”, - ISW-nin analitikləri düşünürlər.

Xatırladaq ki, Ukrayna prezidenti Volodimir Zelenski bundan əvvəl Rusiyanın Sumı və Xarkov vilayətlərində hücuma hazırlaşdığını və hazırlıq üçün vaxt qazanmağa çalışdığını bildirmişdi.

Sahil İsgəndərov
AzVision.az


Teqlər: Rusiya   Ukrayna   hücum  





Xəbər lenti


Azvision.az ©2014 | Bütün hüquqları qorunur