AzVision.az xəbər verir ki, bunu Kənd Təsərrüfatı Nazirliyinin Baş Dövlət Texniki Nəzarət Müfəttişliyinin rəisi Ağakişi Alıyev deyib. Onun sözlərinə görə, istismar müddətini başa çatmış texnikalar sahibkarlar tərəfindən istifadə edilir:

“Nasazlıq aşkarlanan texniki vasitələr əsasən Sovet dövründən qalma vasitələrdir. Kənd təsərrüfatı texnikalarının nasazlığının aradan qaldırılması üçün mütəmadi tədbirlər görülür. Bütün bazalarda vaxtaşırı baxış keçirib, texnikanın yararlılıq vəziyyətinə nəzarət edirik. Hər hansı texniki vasitədə nasazlıq varsa, onun aradan qaldırılması texnikanın sahibi və ya sahibkara bu barədə məlumat veririk. İstismar müddəti başa çatdığına görə qeydiyyatdan çıxarılan texnikanın sayı azdır. Ötən il təxminən 100 belə texnika qeydiyyatdan çıxıb. Lakin hələ də, istismar müddəti bitmiş texnikalardan istifadə edilir. Bu vasitələrdən istifadə yığımda itkiyə səbəb olur”.

A.Alıyev istismar müddəti başa çatmış texnikadan istifadənin bu sahədə çatışmazlıqla əlaqədar olmadığını deyib: “Fermerlər taxılı tez biçmək üçün istismar müddəti başa çatan texnikadan istifadə edir. Halbuki, növbəlilik rejimində məhsulu yığmağa çalışsalar, köhnə kombaynlardan istifadəyə ehtiyac qalmaz. Ölkədə kənd təsərrüfatı texnikasının sayı bütün taxıl sahələrini biçmək üçün yetərlidir. Taxıl biçini adətən 2-2.5 ay davam edir. Lakin fermerlər hamısı eyni vaxtda, təxminən 1 aya bu işi yekunlaşdırmağa çalışır. Nəticədə yararsız texniki vasitələr bu işə cəlb edilir”.

A.Alıyevin sözlərinə görə, bu sahədə mövcud problemləri aradan qaldırmaq üçün ilin sonu növbəti ilin əvvəlində ölkəyə yeni kənd təsərrüfatı texniki vasitələrinin gətirilməsi planlaşdırılır: “Növbəti taxıl biçininə qədər yeni texnikalar ölkəyə gətiriləcək. Həmin texniki vasitələr ən müasir tələblərə cavab verəcək”.

Aytən Zəhra
AzVision.az