Nəqliyyat Nazirliyi Dövlət Avtomobil Nəqliyyatı Xidmətinin Bakı Sərnişin və Yük Daşımalarının Təşkili İdarəsinin rəis müavini Əmrah Cəfərov AzərTAc-a bildirib ki, bu istiqamətlərdə sərnişin avtobuslarının ləngiməsi kimi hallar əsasən onların sistemlərinin donması səbəbindən baş verib. Bununla bağlı olaraq, dərhal çilingərlərdən ibarət 2 operativ qrup yaradılıb və marşrut avtobuslarının işlək vəziyyətə gətirilməsi üçün əraziyə yola salınıblar.

Eyni zamanda, hansı yollardakı avtobusların hərəkəti mümkün deyil, həmin yollara qum-duz qarışığının səpilməsi üçün əlaqədar qurumlara müraciət olunub.

Bəzi marşrutların gecə saat 00.00-dək işləməməsi ilə bağlı sualı cavablandıran Ə.Cəfərov bununla bağlı “qaynar xəttə” hər hansı şikayətin daxil olmadığını bildirib:

“Bu gün də paytaxtda avtobuslar marşrut xətlərinə adi günlərdə olduğu kimi, cədvəl üzrə çıxarılıb və gecə saat 00.00-dək sərnişinlərin mənzil başına çatdırılması təmin ediləcək. Sərnişinlərdən hər hansı bir problemlə üzləşdikdə idarədə yaradılan “qaynar xəttə” (012-561-76-28) müraciət etmələri xahiş olunur”.