Sarkisyanın aprel döyüşlərinə görə dindirilməsi təxirə salınır

  20 Dekabr 2019    Oxunub : 1438
Sarkisyanın aprel döyüşlərinə görə dindirilməsi təxirə salınır
2016-cı ilin aprel döyüşlərini araşdıran Ermənistanın Parlament Komissiyası ilin sonuna kimi sabiq prezident Serj Sarkisyanı dindirməyə çağırmayacaq.
Azvision.az xəbər verir ki, bu barədə “Hraparak” nəşri yazıb.

Daha əvvəl komissiyanın rəhbəri Andranik Köçəryan 40-a yaxın şəxsin dindiriləcəyini və bunun bir neçə ay çəkəcəyini bildirmişdi. Onun bu ilin sonuna qədər Serj Sarkisyanın, keçmiş müdafiə naziri Seyran Ohanyanın və sabiq Baş Qərargah rəisi Yuri Xaçaturovun dindirilməyə çağırılacağı ilə bağlı açıqlamasına baxmayaraq, 2019-cu ildə sorğu-sual baş tutmayacaq. Söhbət ondan gedir ki, komissiya hələ şübhə və dindirilmə üçün əsas ola biləcək məlumatlar almayıb.

Qeyd edək ki, Ermənistan parlamenti dekabrın 10-da aprel müharibəsini araşdıran parlament komissiyasının fəaliyyətini altı ay müddətinə uzatmaq qərarına gəlib.

Mayın 20-də Ermənistanın baş naziri Nikol Paşinyan 2016-cı il aprel müharibəsinin səbəblərini araşdırmağın vaxtı olduğunu deyib. Mayın 31-də isə Ermənistan parlamentinin sədri Ararat Mirzoyan parlament komissiyasının yaradıldığını elan edib. Komissiyanın səlahiyyətlərini parlamentin müdafiə və təhlükəsizlik üzrə daimi parlament komissiyası həyata keçirir.

Pərvanə Sultanova
Azvision.az

Teqlər: Ermənistan   Sarkisyan