“Azərbaycan ABŞ-ın dostudur” - Morninqstar

“Azərbaycan ABŞ-ın dostudur” - Morninqstar
  18 İyun 2014    Oxunub:841
“Mən deyə bilmərəm cəmiyyətin Helsinki Komissiyasında Azərbaycanla bağlı dinləmələrdən gözləntiləri necə olub. Amma dinləmələr çox yaxşı və tarazlı olub”.
AzVision.az xəbər verir ki, bu barədə ABŞ səfiri Riçard Morninqstar ABŞ Konqresinin Helsinki Komissiyasında dinləmələrlə bağlı Turan-ın sualına cavabında bildirib.

Səfirin fikrincə, dinləmələr zamanı demokratiya və insan haqları ilə bağlı bir çox məsələlər əksini tapıb. “Hər iki ölkənin bu məsələlər üzrə birlikdə necə işləməsi barədə də məqamlar qeyd olunub. Ancaq ölkələrimiz arasındakı əlaqələr yalnız bu mövzu ilə məhdudlaşmır. İki ölkənin ortaq maraqlara malik olduğu bir sıra digər sahələr də vardır ki, biz bu sahələr üzrə birgə işimizi davam etdirəcəyik. Azərbaycan ABŞ-ın güclü dostu, tərəfdaşı olaraq qalır və biz ölkələrimiz arasındakı birgə maraqları əhatə edən bir sıra məsələlər, o cümlədən demokratiya və insan haqları məsələləri üzrə birgə işimizi davam etdirməliyik”, deyə Morninqstar qeyd edib.

O, ölkədə demokratiya, insan haqları, siyasi məhbus məsələsi ilə bağlı problemlərin həlli barədə suala cavabında deyib ki, səfirliyi dövründə demokratiya və insan haqları fəal şəkildə iştirak etdiyi, diqqətdə saxladığı bir sahə olub. “Mənim buradakı fəaliyyət müddətimin son gününə qədər biz hökumətlə bu fəaliyyətimizi davam etdirəcəyik. Mənim fəaliyyət müddətim başa çatdıqdan sonra da bu işlər davam etdiriləcək”, deyə səfir bildirib.
Riçar Morninqstar ABŞ-ın Milli Demokratiya Institutu (MDI) na qarşı cinayət işinin açılması ilə bağlı mətbuatda gedən məsələyə ayıdnlıq gətirib. Jurnalistlərin məsələ ilə bağlı şərh vermək xahişinə cavabda səfir prokurorluğa müraciət etməyi tövsiyə edib.

“MDI ilə bağlı müxtəlif KIV-də əks olunan ittihamlar yalnışdır, səhvdir, cəfəngiyyatdır. Biz hesab edirik ki, MDI Azərbaycan qanunvericiliyinə tam uyğun şəkildə fəaliyyət göstərib. Amma MDI-nin Azərbaycandakı yekun statusu ilə bağlı hər-hansı fikrim, şərhim yoxdur”, deyə o bildirib.

Xatırladaq ki, Azərbaycan hakimiyyəti MDI-ni gənclər təşkilatlarının maliyyələşdirilməsi yolu ilə rəngli inqilab hazırlamaqda ittiham edib və faktiki olaraq, bu qurumun fəaliyyətini qadağan edib.

Öz növbəsində, MDI dəfələrlə bu ittihamları təkzib edərək, şəffaf və qanun çərçivəsində fəaliyyət göstərdiyini sübut edib.


Teqlər:





Xəbər lenti