AzVision.az xəbər verir ki, “Azərbaycanfilm” kinostudiyası tərəfindən elan olunan müsabiqənin məqsədi kinoya həvəs göstərən gənclərə özlərini sınamaq üçün imkan yaratmaqdır. 2014-cü il iyunun 11-dən iyulun 20-dək davam edəcək müsabiqədə 29 yaşa qədər olan müəlliflər - rejissor, ssenaristlər istənilən mövzu və janrda bir və daha çox ssenari təqdim edə bilərlər.

Müsabiqəyə ssenariləri cari il iyulun 15-dək “Azərbaycanfilm” kinostudiyasının poçt ünvanı: AZ1012, Bakı şəhəri, Moskva pr.1 və yaxud [email protected] elektron ünvanına təqdim olunmalıdır.
Müəllifin özü haqqında qısa məlumatı və rekvizitləri (poçt ünvanı, telefon, e-mail) ssenariyə əlavə olunmalıdır.

Münsiflər heyətinin rəyi əsasında üç ən yaxşı ssenari müəyyən edilərək “Azərbaycanfilm” kinostudiyasının istehsalat bazasında çəkiləcək. İstehsalına başlanan qalib ssenarilərin müəllifləri ümumi qaydada qonorar alacaqlar.

Qaliblərin adları 2014-cü il avqustun 2-də ttp://azerbaijanfilm.az saytında və “Mədəniyyət” qəzetində açıqlanacaq.

Fatimə Kərimli