AzVision.az Musavat.com-a istinadən xəbər verir ki, S. Novruzov qeyd edib ki, mitinq uğursuz alınıb: “Demək olar ki, keçən dəfəki mitinqdən iki dəfə az insan toplaşmışdı. Bundan başqa mitinq həm sönük, həm çıxışların hər biri bayağı idi. İsa Qəmbər çıxış edəndə isə insanların bir hissəsi meydanı tərk elədi. Eyni zamanda Milli Şurada olanların bir-birinə qarşı olan hikkələri, nifrəti də burada özünü göstərdi. Ümumilikdə onu demək olar ki, növbəti mitinq eləsələr, ora adam gəlməyəcək. Beş-üç nəfər həvəskar cavandan başqa orada adam görmək olmur. Sosial bazaları necə də tükənib! Mitinqdə o qədər təşkilat adı hallandırdılar ki, o təşkilatların adı orada yığışanların sayından çox idi. Adların çəkdiyi təşkilatların hərəsindən bir nəfər gəlsəydi, min-min beş yüz nəfər yığışmış olardı. Amma o da yox idi”.

YAP rəsmisi müxalifətin mitinqlərinin belə olmasının maneələrlə deyil, sosial bazalarının olmaması ilə izah edib: “Bu günə qədər bunlar cəmi bir dəfə Ağstafada görüş keçirmək istəyiblər, onda da Eldar Namazov gedib qəbiristanlıqda qohum-əqrabasını ziyarət edib, qayıdanda da restoranda yeyib-içib Bakıya dönüb. Burada keçirdikləri iki mitinqin də getdikcə birinin əvvəlkindən uğursuz alınması göstərdi ki, əvvəldən onsuzda sosial bazası olmayan bunların aldadıb yoldan çıxartdıqları beş-on adam da gördülər ki, bunlardan heç nə çıxmır. Ortada olan qohum - əqrəbaları, partiya işçiləri, qəzetlərinin nümayəndələrini bura yığıblar”.

AzVision.az xəbər verir ki, hazırda İTV-də yayımlanan debatlarda çıxış edən S.Novruzov baş verən mitinqin uğursuzluğundan danışır. S.Novruzov mitinqdə təhsili tənqid edən C.Həsənlinin 2-il bundan qabaq təhsili tərifləməsi haqda çıxışından sitatlar gətirərək, ikincinin bir həftə bundan sonra nə deyəcəyinin məlum olmadığın bildirdi.