AzVision.az xəbər verir ki, bunu Milli Məclisin deputatı Vüqar Bayramov deyib.

Onun sözlərinə görə, bu kontekstdən Azərbaycanda da dəmiryolu sərinişindaşımada xidmət keyfiyyətin daha da yüksəldilməsi bu sahədəki strategiyanın əsas hədəflərindəndir:

"Azərbaycan Dəmir Yollarındakı son struktur və institutsional dəyişikliklərdən sonra bu sahədə bir sıra islahatlar diqqətimizi çəkdi. Bunlar vacib dəyişikliklər olduğu üçün bu sahədə məlumatlandırma çox vacibdir ki, vətəndaşlarımız həmin imkanlardan faydalana bilsinlər.

Bu həftədən etibarən dəmiryolu sərnişinləri ödədiyi vəsaitin bir hissəsini geri almaq imkanı qazanıblar. Dəmiryolu xidmətində 3.0 faiz keşbekin tətbiq olunması və eləcə də daha erkən alınan biletlərə 15.0 % endirimin tətbiq edilməsi stimullaşdırıcı tədbirlərdəndir. Yəni, artıq dəmiryolu xidmətlərindən istifadə zamanı ödənilən vəsaitin bir hisəsi geri qaytarılacaq. Sərnişinlərin hesablarına keşbek ödənişləri daxil olacaq. 2 gün öncə test rejimində tətbiqinə başlanılan loyallıq proqramı ilə şəhərətrafı qatarlarla səfər edən sərnişinlər “ADY Mobile” tətbiqi vasitəsilə gedişlər üzrə 3% keşbek və eləcə də sorğularda iştirak və qiymətləndirmələr zamanı bonus qazanacaqlar".

Deputat bildirib ki, bu sektorda dinamik qiymət siyasətinin tətbiqi də təqdirəlayiqdir:

"İnkişaf etmiş ölkələrdə qatarlar ilə səfərlər edənlər üçün tələbdən, o cümlədən mövsümdən asılı olaraq fərqli qiymətlər təklif olunur. Yəni, fiks (sabit) qiymət deyil, tələbə bağlı dəyişən qiymət siyasəti var. Azərbaycanda bu sistemə noyabrın 1-dən keçiriləcək.Yeni qiymət siyasətinə əsasən, bilet qiymətləri tələbdən asılı olaraq dəyişə biləcək. Bilet satış sisteminə inteqrasiya edilmiş texnologiyalar sayəsində sərnişinlərə real vaxtda qiymətləri izləmək və ən uyğun səyahət vaxtını seçmək imkanı yaradacaq. Artıq səfərə 25 gün qalmış və əks istiqamətdə oturacağa bilet almış sərnişinlər 15% endirimdən yararlana biləcəklər.

Həm keşbek, həm endirimli və dinamik qiymətlər Azərbaycan dəmiryolu xidmətləri üçün vacib yeniliklərdir. Təbii ki, bu sahədə islahatların dairəsinin daha da genişlənəcəyi gözləniləndir. Yeni dövrün yeni tələbləri daha dinamik idarəetmə və təşviq siyasətini prioritetləşdirir".

Həmidə İbrahimova
AzVision.az