Milli valyutada problemli kreditlərin həcmi artıb

   Milli valyutada problemli kreditlərin həcmi artıb
  12 Fevral 2024    Oxunub:612
Xarici valyutada olan vaxtı keçmiş kreditlərin həcminin son aylar azalmasına baxmayaraq, milli valyutada problemli kreditlərin həcmi artıb.
AzVision.az xəbər verir ki, bunu Milli Məclisin deputatı Vüqar Bayramov deyib. O qeyd edib ki, vaxtı keçmiş kreditlərin həcmi son 3 ayda ümumi kreditlərdə 440.4 milyon manatdan 437.8 milyon manatadək azalıb.

"Azalma xarici valyutada olan kreditlərdə də müşahidə olunub: həmin müddətdə 7.9 milyon manat azalma olub. Bununla belə, milli valyutada olan kreditlər üzrə vaxtı keçmiş kreditlərin həcmi son 3 ayda 324 milyon manatdan 329.3 milyon manatadək yüksəlib. Son rəqəm eyni zamanda illik yekun olub. Bu o deməkdir ki, milli valyutada olan kreditlərdə problemli kreditlərin həcmi 2023-cü ilin sonuncu rübündə 5.3 milyon manat artıb".

Deputat qeyd edib ki, milli valyutada vaxtı keçmiş kreditlərin həcminin artması hələ də bir sıra banklar tərəfindən vətəndaşların ödəmə qabiliyyəti və eləcə də potensial risklər tam nəzərə alınmadan kreditləşməyə getməsi ilə bağlıdır. "Bank kreditləşməsində son dövrlər şəffaflıq güclənsə də risklərin idarəedilməsi mexanizmdə hələ də problemlər mövcuddur.

Kredit faizlərinin yüksək olması da milli valyutada vaxtı keçmiş kreditlərin həcminə təsir göstərir. Yüksək faizlə borclanma daha sonra kredit öhdəliklərinin yerinə yetirilməsində çətinlik yaradır. Bu isə kreditlərin faiz dərəcələrinin optimallaşdırılmasını bir daha prioritetləşdirir.
Bütün hallarda, sabit məzənnə kontekstində milli valyuta üzrə vaxtı keçmiş kreditlərin həcminin artması arzuolunan deyil. Bu o deməkdir ki, kreditərin valyuta və eləcə də müddət növünə görə də xüsusi yanaşma və standartların tətbiqinə ehtiyac var".

Aytən Zəhra
AzVision.az


Teqlər:





Xəbər lenti