Xor artistimiz Gürcüstanda mükafata layiq görülüb

Xor artistimiz Gürcüstanda mükafata layiq görülüb
  01 İyun 2019    Oxunub:2970
Mayın 1-dən 4-ə qədər Gürcüstan Respublikasının paytaxtı Tibilisi şəhərində məşhur gürcü bəstəkarının xatirəsinə həsr edilən vokalçıların “Vaja Çaçava adına III Beynəlxalq Müsabiqə”si keçirilib.
Azvision.az xəbər verir ki, Gürcüstanla yanaşı, Rusiya, Ukrayna, Qazaxıstan, Koreya və digər ölkələrin iştirak etdiyi müsabiqədə ölkəmizi Azərbaycan Dövlət Akademik Musiqili Teatrının xor artisti, respublika və beynəlxalq müsabiqələr laureatı Güllübəyim Məmmədova təmsil edib və 2-ci yerlə mükafatlandırılıb.

“Belə bir beynəlxalq müsabiqədə ölkəmizi təmsil etməkdən qürur duyuram. Qonşu ölkədə bu çıxışım istər münsiflər heyəti, istərsə də çoxmillətli auditoriya tərəfindən yüksək qarşılandı. Nəticə olaraq rusiyalı həmkarımdan sonra 2-ci yerə layiq görüldüm. Orada olarkən Azərbaycan vokal sənətinin inkişafı barədə deyilən gözəl sözlər xüsusilə mənə qol-qanad verdi… Müsabiqədə iştirakım üçün şərait yaradanlara, başda Akademik Musiqili Teatrın rəhbərliyi olmaqla hər kəsə dərin təşəkkürümü bildirirəm”, -deyə G.Məmmədova xoş təəssüratlarını paylaşıb.

Qeyd edək ki, Güllübəyim Məmmədova 2011-2015-ci illərdə Bakı Musiqi Akademiyasında “Vokal” ixtisası üzrə təhsil alıb, 2015-2017-ci illərdə isə həmin təhsil müəssisəsinin magistraturasını fərqlənmə diplomu ilə bitirib. Ötən ilin oktyabr ayından Akademik Musiqili Teatrda xor artisti vəzifəsində çalışan istedadlı vokalçımız teatrın repertuarında olan “Toya bir gün qalmış”, “Bankir adaxlı”, “Baladadaşın toy hamamı”, “O olmasın, bu olsun”, “Arşın mal alan”, “Qızıl toy”, “Mən dəyərəm min cavana”, “Silva”, “Nuri-didə Ceyhun”, “Amerikalı kürəkən”, “Talelər qovuşanda”, “999-cu gecə”, “Bir dəfə Bağdadda” və başqa tamaşalarda uğurla iştirak edib. İndiyə qədər bir çox konsert və dövlət tədbirlərinin iştirakçısı olub.

Azvision.az





Teqlər: GüllübəyimMəmmədova   Xor   Mükafat  





Xəbər lenti


Azvision.az ©2014 | Bütün hüquqları qorunur