1995-ci ildən bu günədək Azərbaycanda əfvlə bağlı imzalanmış fərman və sərəncamlara əsasən 5683 nəfər azadlığa buraxılıb.

Azvsison.az xəbər verir ki, bu sözləri jurnalistlərə müsahibəsində Penitensiar Xidmətin rəisinin müavini, ədliyyə general-mayoru Hüseyn Əlixanov deyib.

H.Əlixanov bildirib ki, Prezident İlham Əliyevin oktyabrın 14-də imzaladığı Sərəncamla 153 nəfər əfv olunub.

O deyib ki, Azərbaycanda mütəmadi olaraq əfv sərəncamları imzalanır. Sonuncu əfv Sərəncamı isə Qurban bayramına təsadüf etdiyindən xüsusi sevinclə qarşılanır. Bu Sərəncam daha çox insana şamil edildi.

H.Əlixanov xatırlatdı ki, bu yaxınlarda təxminən üç minə yaxın məhkum Amnistiya aktı ilə azad edilib. Yeddi minə yaxın şəxs isə digər cəza növlərindən azad olunub, və ya cəzaları azaldılıb.

Penitensiar Xidmətin rəis müavini bildirdi ki, Azərbaycanda əfv aktının tətbiqi çox obyektiv şəkildə həyata keçirilir. Əfv Sərəncamı bir qayda olaraq cəzaçəkmə müəssisələrində öz nümunəvi davranışları ilə fərqlənən, gələcəkdə cinayət törətmə ehtimalları minimum olan, həqiqətən islah olunmuş məhkumlara şamil edilir.