Şəhər nfrastrukturumuz bir yağışla çökəcək qədər zəifdirmi?

Məsələ ilə bağlı AzVision.az-a danışan iqtisadçı ekspert Natiq Cəfərli bildirib ki, yağış, qasırğa və s kimi təbii fəlakətlər nəticəsində şəhər infrastrukturuna ziyan dəyməsi mümkündür.

Onun sözlərinə görə, Bakı ilə bağlı problem daha dərindir:

Bakıya yağan güclü yağış 2 nəfərin ölümünə səbəb olub

"Çünki Bakının kanalizasiya sistemi əhalisinin sayına uyğun deyil. Ən yaxşı halda 2 milyon insan üçün nəzərdə tutulmuşdu. İndi Bakı və ətrafında 4 milyon insan yaşayır. Yağış yağan kimi də sularının kanalizasiyaya axıdılması mümkünsüz hala gəlir. Nəticə etibarilə belə subasmalar olur. Bu arxitektura səhvlərinin nəticəsidir. Tunellər tikərkən suların yığılmasını nəzərə alaraq orada suların axıdılıb başqa yerə yönləndirilməsi nəzərdə tutulmalı idi. Bunlar edilməyib və tikinti zamanı texniki səhvlər olub".

Ekspert onu da bldirib ki, bu problemlərin qlobal həlli üçün Bakı bir mərkəzdən idarə olunmalıdır:

"Bakı Şəhər İcra Hakimiyyəti var, amma Bakı şəhərində bütün qurumlar, dövlət və hökumət qurumları özləri öz sahələrinə cavabdehdirlər. Bu, Bakı şəhər İcra Hakimiyyətindən kənar baş verir. Amma biz dəfələrlə təklif etmişik ki, Bakıda böyük şəhər bələdiyyəsi yaradılmalıdır. Mer institutu təsis olunmalıdır, orada seçkilər keçirilməlidir. Bakı şəhərinin hökuməti formalaşmalıdır ki, su, kanalizasiya, nəqliyyat, elektrik enerjisi, qaz təminatı bütün bunlar bir mərkəzdən idarə olunsun.

Bu zaman belə hadisələrin sayı azalar və “məsuliyyətli” şəxslərin üzə çıxmasına səbəb olar. Çünki seçilmiş mer olacaqsa və şəhərdə belə hadisələr baş verəcəksə, növbəti dəfə o seçilməyəcək, insanların gözündən düşəcək. Əhalinin onu seçdiyinə görə yaxasından tutub tələb etmək haqqı da yaranacaq. Böyük şəhər bələdiyyəsinin təsisi bir çox məsələlərin həllində yardımçı ola bilər".

Həmidə İbrahimova
AzVision.az