Türkiyəli general: “Ermənistan ordusu darmadağın edilib” - EKSKLÜZİV

  23 Oktyabr 2020    Oxunub : 25195
  Türkiyəli general:  “Ermənistan ordusu darmadağın edilib” -  EKSKLÜZİV
Azərbaycan Silahlı Qüvvələri Ermənistan ordusunu darmadağın edib.
Bunu Azvision.az -a açıqlamasında Türkiyənin Azərbaycandakı səfirliyinin sabiq hərbi attaşesi, general Yücel Karauz deyib.

O bildirib ki, Ermənistan 1992-93-cü illərdə başqa ölkələrin dəstəyi ilə işğal etdiyi Dağlıq Qarabağ və Azərbaycanın 7 rayonunu öz silahlı qüvvələrinin böyük uğuru kimi təqdim etməyə çalışırdı. Amma hazırda davam edən müharibədə işğalçı ölkə ağır məğlubiyyətə uğradı.

"Ermənistan silah və hərbi texnikalarının təqribən 60, şəxsi heyətinin 30-35 fazini itirib, strateji mövqelər əlindən çıxıb, 125-ə yaxın məntəqəni itirdiyi üçün geri çəkilmək məcburiyyətində qalıb. Ermənistan rəhbərliyi bunu həm öz xalqına, həm də onu himayə edən ölkələrə anlada bilmir. Çünki 30 il ərzində "çox güclü, qüvvətli orduya" malik olmaları barədə mif yaratmışdır”.

General onu da deyib ki, Ermənistan tərəfi Azərbaycanın guya Suriyadan və digər ölkələrdən döyüşçülər cəlb etməsi ilə bağlı yalan məlumatlar tirajlayır: “Lakin bu yalanı sübut edəcək heç bir dəlil ortaya qoya bilmirlər. İkincisi, bunu yaymaqda məqsədləri Azərbaycan Ordusunun gücsüz olduğunu göstərməkdir. Məlumdur ki, Ermənistan özü müxtəlif ölkələrdən muzdlular və terrorçular gətirir. Azərbaycanın cəbhədəki uğurlarını muzdlular və terroçulara bağlamaq həm daxilə, həm də beynəlxalq aləmə hesablanıb.
Bunu etmələrinin bir səbəbi də Ermənistan ordusunun darmadağın olmasıdır”.

Y.Karauz hesab edir ki, Ermənistan bu təxribatları ilə beynəlxalq qurumların, o cümlədən BMT-nin diqqətini çəkmək, humanitar atəşkəs adı altında vaxt qazanmaq, uzun müzakirələr dönəminin başlamasına nail olmaq istəyir.

“Lakin, heç nə bu gerçəyi dəyişə bilməz: Şanlı Azərbaycan Ordusu Prezident İlham Əliyevin rəhbərliyi ilə Ermənistanı həm masada, həm də meydanda tarixə gömüb. Bu, qələbə - Böyük Vətən müharibəsi Azərbaycanın şanlı tarixində qızıl hərflə yazılacaq”.

Pərvanə Sultanova
Azvision.az

Teqlər: YücelKarauz