İran psixiatrları məhkəmələrin hökmlərinə qarşı

İran psixiatrları məhkəmələrin hökmlərinə qarşı çıxırlar

11:40 21 İyul 2023 Oxunub:880

İran məhkəməsinin hicabdan imtina edən qadınlar barəsində qıcıqlandırıcı və absurd hökmlər çıxarması elmi dairələrdə də ciddi narazılıqla qarşılanır.

AzVision.az xəbər verir ki, son günlər üç aktrisa—Əfsanə Bayqan, Azadə Səmədi və Leyla Bleukat məcburi hicaba riayət etmədiklərinə və guya anti-ailə şəxsiyyət pozğunluğuna görə müalicə üçün məcburi şəkildə psixoloji mərkəzlərə göndəriliblər. İranın 4 psixi sağlamlıq dərnəyinin rəhbərləri İran Məhkəməsinin rəhbəri Qulamhüseyn Möhsüni Ajeiyə göndərdikləri məktubda bəzi qadın sənətçilərə “hicabsızlıq” ittihamı ilə çıxarılan son hökmlərə qarşı çıxaraq, həmin verdiktlərin dəyişdirilməsini tələb ediblər.

“Digər xəstəliklərin diaqnozu, həkimlərin səlahiyyətində olduğu kimi, psixi pozğunluqların diaqnozu hakimin deyil, psixiatrın səlahiyyətindədir. Qətnamə mətnində antisosial şəxsiyyət adlı xəstəliyin diaqnozu üçün arqument kimi deyilənlər mütənasib, məntiqli və inandırıcı deyil. İnsanların davranışlarını psixiatrik diaqnozlarla damğalamaqdan çəkinməlisiniz. Məhkəmə sistemində psixiatriya və psixologiyadan sui-istifadə edilir. Məqsəd bir neçə aktyoru qurban verməklə başqalarını qorxutmaqdır? Heç bir cəmiyyət qadınları və sənətçiləri alçaltmaqla islah olunmayıb, dəyişdirilməyib”, - məktubda deyilir.

Məktubu İran Psixiatrları elmi assosiasiyasının prezidenti Məcid Sadiqi, İran Psixoterapiya elmi assosiasiyasının prezidenti Behruz Dulteşahi, İran Psixosomatik tibb-elmi assosiasiyasının prezidenti Əhməd Əli Nurbala və İran Psixiatrlar assosiasiyasının prezidenti Həmidrza Porşərifi imzalayıblar.

Bu mütəxəssislər İran məhkəmə sistemini bu cür hökmlərlə “cəmiyyətdə insanların şüurunda “ruhi xəstəliklər damğasının” genişlənməsinə və işıqlandırılmasına, “müalicəsinə ehtiyac duyulan insanların lazımi müalicədən çəkinməsinə” və “psixi sağlamlıq xidmətlərinə çıxış yolunda sosial maneələrin” əlavə edilməsinə səbəb olacağında ittiham ediblər.
AzVision.az

Teqlər: İran psixiatrlar