Bu barədə AzVision.az -a MEK-dən məlumat verilib. Bildirilib ki, açılış təliminə ilk olaraq Bakı Dövlət Universitetinin Kitabxanaçılıq-informasiya və Filologiya fakültələrinin tələbələri cəlb edilib. Təlimləri təcrübəli vikipediyaçılar MEK-in Elektron resurslar şöbəsinin mütəxəssisləri Nuray Tanrıverdiyeva və Səbinə Abizadə keçəcək. Təlim zamanı tələbələrə “Vikipediya”nın mahiyyəti izah ediləcək, onlayn ensiklopediyanın iş prinsiplərinə dair məlumatlar, istifadə qaydaları və məqalə yaratmaq kimi bacarıqlar aşılanacaq. Təlimlər 1 ay müddətində kiçik qruplar şəklində keçiriləcək. Sonda iştirakçılara sertifikat veriləcək.



Təlimin açılışında qeyd olunub ki, 6 ildir kitabxanada ardıcıl “Vikipediya” maarifləndirici təlimləri təşkil edilir, lakin son iki ildə pandemiya ilə əlaqədar bu işə ara verilib. “Vikipediya” informasiya mühitində prioritet istiqamətlərdən biridir. Mütəxəssislər, müxtəlif dövlət qurumları və AMEA əməkdaşları, universitet tələbələri mütəmadi şəkildə viki-təlimlərə cəlb ediləcək.

Bildirilib ki, Mərkəzi Elmi Kitabxanada təlimlərə yenidən start verilməsi sevindirici haldır. “Qorqud” Vikipediya Metodik Klubunun yaradılmasının təşəbbüskarı, Milli Məclisin deputatı Elnur Allahverdiyev bu prosesin ölkədə sürətləndirilməsini dəstəkləyənlərdən biridir. “Vikipediya” Azərbaycan həqiqətlərini müxtəlif dillərdə təbliğ və təqdim edən əhəmiyyətli platformalar sırasındadır. Əsas güc isə ölkəmizin milli maraqlarının təmin olunması istiqamətində çağdaş dövrün informasiya texnologiyalarından yararlanmağı bacaran, səsimizi-sözümüzü xarici dillərdə çatdırmağı bilən gənclərin üzərinə düşür.


AzVision.az