“Məlumatlar bizdə nikbin əhval-ruhiyyə oyatdı” - Pilotun qohumu

  29 İyul 2019    Oxunub : 8718
“Məlumatlar bizdə nikbin əhval-ruhiyyə oyatdı” - Pilotun qohumu
“Pilotun axtarışları yüksək səviyyədə aparılır. Ümid edirəm ki, müsbət nəticə əldə olunacaq”.

Bunu Azvision.az -a açıqlamasında MiQ-29 təyyarəsi ilə qəzaya uğrayaraq Xəzər dənizinə düşən pilot Rəşad Atakişiyevin qaynatası, tanınmış politoloq Qabil Hüseynli deyib.
Politoloq pilotun axtarışının yüksək səviyyədə təşkil olunduğunu bildirib: "Axtarış çox mükəmməl şəkildə təşkil olunub və xeyli sayda texnik vasitədən istifadə edilir".



Q.Hüseynli qeyd edib ki, bu yaxınlarda Müdafiə naziri Zakir Həsənovla görüşü zamanı texniki vasitələrlə aparılan axtarışlar ona göstərilib və geniş məlumat verilib:

“Müdafiə Nazirliyinin, Fövqəladə Hallar Nazirliyinin və Dövlət Sərhəd Xidmətinin hərbçilərinin, texniki vasitələrinin hansı işləri gördüyü barədə məlumatlandırıldıq. Axtarışlara xeyli sayda mütəxəssis cəlb edilib. Sıravi əsgərlər də sahilboyu axtarış aparır. Ötən gün də axtarış zonasında olduq. Axtarışlarla bağlı ətraflı məlumat verildi. Məlumatlar bizdə nikbin əhval-ruhiyyə oyatdı ki, işlər qısa müddətdə başa çata bilər".

Xatırladaq ki, iyulun 24-də saat 22.00 radələrində plana uyğun olaraq gecə vaxtı təlim-məşq uçuşları keçirən Hərbi Hava Qüvvələrinin MiQ-29 təyyarəsi ilə qəflətən rabitə əlaqəsi kəsilib və aviasiya vasitəsi radarlardan itib. Təyyarə Xəzər dənizinə düşüb.

Anar Kəlbiyev
Azvision.az

Teqlər: Pilot   Axtarış   MİQ-29