Azvisionun əldə etdiyi məlumata görə, mayın 25-də daha 110 məhkum amnistiyaya düşərək azadlığa buraxılıb.

Beləliklə mayın 8-dən bu günədək 1468 məhkuma amnistiya tətbiq edilib. Onlardan 800 nəfər azadlıqdan məhrumetmə cəzasından azad edilib, 461 nəfər islah işləri cəzasından, 8 nəfər ictimai işlər cəzasından, 177 nəfər cərimə cəzasından azad edilib.

Bundan əlavə, 22 nəfər azadlıqdan məhrum etmə ilə bağlı olmayan cəzaya şərti məhkum edilib və ya bu növ cəzadan şərti olaraq vaxtından əvvəl azad edilib, yaxud bu növ cəzasının çəkilməsi təxirə salınmış şəxslər, azadlıqdan məhrum etmə cəzasına şərti məhkum edilib, azadlıqdan məhrum etmə cəzası təxirə salınıb, azadlıqdan məhrum etmə cəzasından şərti olaraq vaxtından əvvəl azad edilmiş şəxslər və əsas cəza kimi müəyyən vəzifə tutma və ya müəyyən fəaliyyətlə məşğul olma hüququndan məhrum etmə cəzasına məhkum olunmuş şəxslər müvafiq cəzalardan azad edilib.

Amnistiya qərarının icrası gündəlik olaraq həyata keçirilir və qərara əsasən 4 ay müddətində tam icra olunmalıdır.

Xatırladaq ki, Amnistiya aktına əsasən böyük ictimai təhlükə törətməyən və az ağır bir sıra cinayətlərə görə məhkum edilmiş qadınlar, cinayət törədərkən 18 yaşına çatmayanlar, birinci və ya ikinci qrup əlillər, 60 yaşına çatmış kişilər, öhdəsində yetkinlik yaşına çatmayan, yaxud birinci və ya ikinci qrup əlil övladı olanlar, Azərbaycan Respublikasının suverenliyinin və ərazi bütövlüyünün qorunması uğrunda döyüşlərdə iştirak etmiş, Azərbaycan ərazisinin bir hissəsinin işğalı nəticəsində öz doğma torpaqlarından məcburi köçürülmüş və bəzi digər kateqoriyalardan olan şəxslərin azadlıqdan məhrum etmə cəzasından azad edilmələri nəzərdə tutulur.

Həmçinin, azadlıqdan məhrum etmə cəzasının çəkilməmiş hissəsi bir ildən artıq olmayan məntəqə tipli cəzaçəkmə müəssisələrində cəza çəkən, islah işləri, ictimai işlər cəzalarına məhkum edilmiş bütün şəxslərə, habelə cərimə cəzasına məhkum edilmiş, cəzasının çəkilməsi təxirə salınmış, şərti məhkum edilmiş və digər qruplara daxil olan bir sıra məhkumlara amnistiya tətbiq edilməklə, cəzadan azad olunacaq.

Ümumilikdə təqribən 9.000 şəxsin amnistiya aktının təsiri altına düşməsi ehtimal edilir. Bunlardan 2.000-dən artıq məhkumun azadlıqdan məhrum etmə yerlərindən azad edilməsi gözlənilir.

Azvision.az saytı vasitəsi ilə gündəlik olaraq amnistiyanın icrası ilə bağlı məlumatları izləyin.