Tikinti şirkətlərinin yeni fırıldağı - Diqqətli olun

  31 Mart 2016    Oxunub : 3654
Tikinti şirkətlərinin yeni fırıldağı - Diqqətli olun
“Banklardan sonra bir sıra tikinti və avtomobil servis şirkətləri də əhalini aldatmağa və yumşaq desək şirnikləşdirməyə başlayıblar”.
AzVision.az xəbər verir ki, bununla bağlı iqtisadçı Vüqar Bayramov vətəndaşları xəbərdarlıq edib.

Ekspertin sözlərinə görə, son zamanlar müxtəlif şirkətlərin 4.4 effektiv faizlə mənzil və ya avtomobilin kreditə satışı barədə aldadıcı reklamlar yayılıb. İqtisadçı hesab edir ki, dünyanın heç bir normal şirkətinin iş təcrübəsində yalnız effektiv faizləri elan etməyə rast gəlinmir:

“Effektiv faizlər birbaşa müştəriləri aldatmaq və onların real (nominal) olmayan faizlər ilə cəlb etmək məqsədi daşıyır. Əgər müştəri 4.4 faizlə kredit götürə bilməyəcəksə və mənzil və ya avtomobil kreditini rəsmilləşdirən zaman daha yüksə faizlərlə rastlaşacaqsa belə saxta faizləri elan etmək biznesin ən adi etik prinsiplərinə ziddir. Təbii ki, kredit üzrə effektiv faiz 4.4 faizdirsə o zaman real faiz şərtlərdən asılı olaraq, bundan 2 dəfəyə yaxın çoxdur. Bu ona bənzəyir ki, mağazadan su alırsınız və onun üzərinə 80 qəpik yazılıb, kassaya yaxınlaşıb ödəniş edəndə satıcı sizdən 1 manat 20 qəpik tələb edir və deyir ki, su üzərində olan effektiv qiymətdir və ora kommunal xərclər, işçilərin maaşı və s. daxil deyil. Real qiymət 1 manat 20 qəpikdir. Bu 4.4 faiz effektiv faiz elan edib, amma kreditə daha yüksək faiz hesablamaqdan heç də az təəccüblü deyil. Çünki hər iki halda müştərinin aldadılması baş verir”.



V.Bayramov qeyd edib ki, ötən il Mərkəzi Bank yalnız effektiv faizin qadağan edilməsi barədə banklara məktub göndərsə də, yenə müştərilərin aldadılması davam edir: “Mərkəzi Bank isə buna, yumşaq desək, “göz yumur”. Bir azdan bu şirkətlərin müştəriləri cəlb etmək üçün mənzillərin və ya avtomobillərin effektiv qiymətlərini elan etsələr təəccüblənməyin. Deyə bilərlər ki, hansısa avtomobil 15 min manat effektiv qiymətə təklif edilir. Avtomobili alanda isə deyəcəklər ki, real qiymət 25 min manatdır, elan edilən effektiv qiymət idi. Qəribədir, amma bizdə bu heç kimi artıq yəqin ki təəccübləndirməz.Təəssüf ki, bəzi şirkətlər biznes etikası və ya müştəri məmunluğunu deyil, yenə də daha qısa zamanda daha çox gəlir əldə etməyi hədəfləyirlər”.

Anar Kəlbiyev
AzVision.az

Teqlər: