`ASAN Xidmət`in nailiyyətləri Azərbaycan Prezidentinin güclü siyasi iradəsinin nəticəsidir – EKSKLÜZIV

`ASAN Xidmət`in nailiyyətləri Azərbaycan Prezidentinin güclü siyasi iradəsinin nəticəsidir – EKSKLÜZIV
  12 Fevral 2014    Oxunub:1824
Azərbaycan Respublikası Prezidentinin Administrasiyası Hüquq-mühafizə Orqanları ilə İş Şöbəsinin müdiri Fuad Ələsgərovun müsahibəsi

- Azərbaycan Respublikası Prezidentinin 11 fevral 2014-cü il tarixli Fərmanı ilə “ASAN xidmət” mərkəzlərinə hansı yeni xidmətlər əlavə edilib?

- Azərbaycan Respublikasının Prezidenti yalnız “ASAN xidmət” mərkəzlərinin coğrafiyasının deyil, həm də mərkəzlərdə göstərilən xidmət növlərinin sayının artırılması, daha geniş sahələr üzrə vətəndaşlara keyfiyyətli və şəffaf xidmətlərin göstərilməsi barədə ciddi tapşırıqlar verib.

Əgər bu günə qədər “ASAN xidmət” mərkəzlərində 25 hüquqi xidmət göstərilidisə, Azərbaycan Respublikası Prezidentinin tapşırığı ilə həmin xidmətlərin dairəsi daha da genişləndirilib. Belə ki, cənab Prezidentin imzaladığı 11 fevral 2014-cü il tarixli Fərmanla:
- mənzillər üzərində mülkiyyət hüquqlarının ilkin və təkrar dövlət qeydiyyatına alınması və çıxarışların, texniki pasportların verilməsi,
- fərdi yaşayış evləri üzərində mülkiyyət hüquqlarının təkrar dövlət qeydiyyatına alınması və çıxarışların, texniki pasportların verilməsi,
- yaşayış yeri üzrə qeydiyyata alındığı və ya qeydiyyatdan çıxarıldığı hallarda çağırışçıların və hərbi vəzifəli vətəndaşların hərbi qeydiyyata qəbulu və hərbi qeydiyyatdan çıxarılması,
- xaricdə istifadə üçün nəzərdə tutulan sənədlərə apostil verilməsi üçün sənədlərin qəbulu xidmətləri “ASAN xidmət” mərkəzlərində həyata keçiriləcək.

Cənab Prezidentin fərmanı ilə elektron xidmətlərin dairəsi də genişləndirilib. Belə ki, fərmanda nəzərdə tutulan “ASAN ödəniş” sistemi elektron xidmət olaraq həm nağdsız ödənişlərin aparılmasını stimullaşdıracaq, həm də bütün inzibati cərimələrin, məhkəmə qərarı ilə ödənilməli olan vəsaitlərin onlayn rejimdə ödənilməsini təmin edəcək.

Məsələn, hər hansı sürücü yol hərəkəti qaydasını pozduqda qəbul edilən inzibati cərimə barədə qərar və törətdiyi qayda pozuntusunun foto və ya video çəkilişi “ASAN ödəniş” sistemi vasitəsilə həmin sürücünün e-mail ünvanına və ya mobil telefon nömrəsinə göndəriləcək. “ASAN ödəniş” sistemi vətəndaşı cərimənin ödənilməsi müddətinin bitməsi barədə xəbərdar edəcək. Vətəndaşlar istənilən inzibati cəriməni heç bir dövlət orqanına getmədən mobil telefonla ödəmə imkanı əldə edəcək.

Bundan əlavə, cərimələrin digər alternativ ödəmə üsulu da nəzərdə tutulub. Belə ki, vətəndaşlar cərimələri ticarət mərkəzlərində, yanacaqdoldurma məntəqələrində, avtomobil dayanacaqlarında və əhalinin intensiv istifadə etdiyi digər ictimai yerlərdə quraşdırılmış xüsusi ödəmə terminalları vasitəsilə ödəyə biləcəklər. “ASAN ödəniş” sistemi eyni zamanda cərimə və digər pul vəsaitlərinin ödənilməsi barədə məhkəmə qərarlarını icra etmək üçün ödənişlərin məhkəmələrin inzibati binalarında və digər ictimai yerlərdə quraşdırılan xüsusi ödəmə terminalları vasitəsilə ödənilməsini təmin edəcək.

Cəriməni qısa müddət ərzində ödəyən şəxslər cərimə məbləğinin müəyyən faizi məbləğində ödənişdən azad olunacaq. “ASAN ödəniş” sistemi imkan verəcək ki, vətəndaş cərimə olunması barədə məlumat əldə etsin və cəriməni dərhal ödəməklə müəyyən edilmiş güzəştdən yararlana bilsin. ASAN ödəniş sistemi bütün dövlət orqanları tərəfindən tətbiq edilən inzibati cərimələri ödəmək imkanı yaradacaq. Artıq həmin sistemin yaradılması üçün insitusional və praktiki tədbirlər görülməsinə başlanılıb.

Bu islahatlar bir neçə məqsədə xidmət edir:
- vətəndaşla dövlət orqanı əməkdaşı arasında birbaşa təması istisna edir,
- şəffaflığı və operativliyi təmin edir,
- korrupsiya və digər neqativ halların qarşısını alır,
- habelə hüquq qaydlarını pozan şəxslərin cəriməni ödəməkdən yayınma halları aradan qalxır.

- Ümumiyyətlə, ölkəmizdə dövlət orqanları tərəfindən göstərilən xidmətlərin vahid reyestri aparılırmı?

- Fərmanda Nazirlər Kabinetinə dövlət orqanları tərəfindən həyata keçirilən xidmətlərin reyestrinin elektronlaşdırılması ilə bağlı təkliflərini təqdim etməsi barədə tapşırıq verilib.

Hazırda dövlət orqanlarının göstərdikləri bütün xidmətlərin ümumi sayı və onların reyestrinin aparılması istiqamətində müəyyən işlər görülür. Xidmətlərin reyestrinin elektron qaydada aparılması bizə hansı xidmətlərin göstərildiyi və onlardan hansıların elektronlaşdırıldığını müəyyən etməyə imkan verəcək. Bununla “elektron hökumət”ə keçid prosesi daha da sürətlənəcək.

- “ASAN xidmət” mərkəzlərinin son 1 il ərzində fəaliyyətini necə qiymətləndirirsiniz?

- Azərbaycan Respublikasının Prezidenti İlham Əliyev cənabları tərəfindən yaradılan “ASAN xidmət” fəaliyyətə başladığı 1 il ərzində qarşısına qoyulan vəzifənin öhdəsindən layiqincə gələrək insanların etimadını doğruldub. “ASAN xidmət” dövlət xidmətlərinin göstərilməsi sahəsində müasir texnologiyaların tətbiqi ilə korrupsiya hallarının istisna edilməsinə, şəffaflığın, vətəndaş məmnunluğunun təmin edilməsinə nail olub.

“ASAN xidmət”in ötənilki fəaliyyəti ilə bağlı qısa məlumat vermək istərdim. Hazırda Bakı şəhərində 3, Sumqayıt və Gəncə şəhərlərində 1 “ASAN xidmət” mərkəzi fəaliyyət göstərir.

“ASAN xidmət” mərkəzlərinin fəaliyyət dairəsinə daxil olan əhalinin sayı 3 milyon 500 min nəfərə qədərdir. Bu da, ölkə əhalisinin təxminən 37%-i deməkdir.

Fəaliyyətə başladığı vaxtdan bu günədək “ASAN xidmət” mərkəzlərinə 1 milyon 100 mindən artıq insan müraciət etmiş və müxtəlif xidmətlərdən yararlanıb. O cümlədən, mərkəzlərin əhatə etmədiyi rayonlarda xüsusi texniki vasitələrlə təchiz edilmiş avtobuslar vasitəsilə 60 minədək vətəndaşa səyyar xidmət göstərilib.

Eyni zamanda, fevralın 1-dən vətəndaşların istəyindən asılı olaraq onların mərkəzə gəlmədən arzuladığı yerdə xidmətlərdən yararlanması üçün səyyar xidmətlər həyata keçirilməyə başlanıb. Xüsusi vurğulamaq istərdim ki, səyyar xidmət kənardan qulluğa və yardıma ehtiyacı olan əlillər və sağlamlıq imkanları məhdud uşaqlar üçün əlavə ödəniş aparılmadan həyata keçirilir.

Əlillərə mərkəzə gəlmədən evində ödənişsiz səyyar xidmət göstərilməsi cənab Prezidentin əlillərin sosial müdafiəsi sahəsində həyata keçirdiyi siyasətin tərkib hissəsidir və bunu sosial həmrəylik layihəsi kimi səciyyələndirmək olar.

Gün ərzində 6000-6500 vətəndaş “ASAN xidmət” mərkəzlərinə müraciət edir. 2013-cü il fevralın 1-dən fəaliyyətdə olan Çağrı Mərkəzində (“Call center”də) 148.000 zəng qeydə alınıb. Bundan əlavə, sosial şəbəkələr (Facebook, Twitter, Instagram) vasitəsi ilə 35.000-ə yaxın müraciət qəbul edilib. “ASAN xidmət” mərkəzinin rəsmi Facebook səhifəsi 2012–ci il oktyabrın 20-də fəaliyyətə başlayıb. Rəsmi səhifəyə qoşulan abunəçilərin sayı isə 115 mini keçib.

Mərkəzlərdə aparılan rəy sorğuları və exit-poll-ların nəticələrinə görə vətəndaşların 95-100%-i “ASAN xidmət”dən razıdır. Bu günə kimi Dövlət Agentliyi tərəfindən mərkəzlərdə işləyən bütün əməkdaşlara etik davranış, ünsiyyət qurmaq bacarığı, stress menecment, sosial həssaslıq, vaxtın idarə edilməsi, korporativ mədəniyyət və.s mövzularda 183 təlim keçirilib.

Eyni zamanda bildirmək istəyirəm ki, regionlarının sosial-iqtisadi inkişafı Dövlət proqramlarının icrasına həsr olunmuş konfransdakı çıxışında Azərbaycan Respublikasının Prezidenti möhtərəm İlham Əliyev cənabları hər bir dövlət qulluqçusunun fəaliyyətinin əsas prinsiplərini müəyyən edib: “Hər bir dövlət məmuru öz məsuliyyətini dərk etməlidir. Hər bir dövlət məmuru təmiz işləməlidir, xalqla bir yerdə olmalıdır, təvazökar, işgüzar və vətənpərvər olmalıdır, rüşvət almamalıdır, özünü xalqdan üstün tutmamalıdır, işlədiyi bölgələrdə, sahələrdə hörmət qazanmalıdır və Vətənə sadiq, sədaqətli olmalıdır”.

“ASAN xidmət”in bütün əməkdaşları da çalışır ki, cənab Prezidentin müəyyən etdiyi bu prinsiplərə dönmədən əməl etsinlər.

- Cəmiyyətdə belə bir təəssürat yaranıb ki, ASAN Xidmət gənclər qurumudur...

- Bu, tamamilə doğrudur. ASAN Xİdmət əməkdaşlarının tam əksəriyyəti gənclərdir, onların orta yaş həddi 24-dür. ASAN Xidmətə işə qəbul tam şəffaf və ədalətli qaydalarla aparılır. Xidmətin kadr və idarəçilik sistemi ən yüksək beynəlxalq standartlara cavab verir.

ASAN-da könüllülük geniş vüsət almışdır. Ümumilikdə “ASAN xidmət” mərkəzlərində mindən artıq gənc könüllülük fəaliyyətinə cəlb olunub. Onlar ASAN Xidmət mərkəzlərinə müraciət edən vətəndaşlara hörmət və nəzakətlə yardım edirlər. Gənclər yüksək entuziazm nümayiş etdirir, dövlət orqanlarının fəaliyyətinə böyük maraq göstərir. Bu gənclərin gələcəyi üçün stimul yaradır.

Belə ki, ali təhsilini bitirmiş və könüllü kimi fəaliyyətini başa çatdırmış gənclərin bir hissəsi “ASAN xidmət” mərkəzlərində və digər dövlət qurumlarında işlə təmin ediliblər.
Əldə olunan nailiyyətlət möhtərəm Prezidentimiz cənab İlham Əliyevin birbaşa dəstəyi və güclü siyasi iradəsi ilə mümkün olub.


Teqlər:  





Xəbər lenti