“Minlərlə əsgərimiz öldü, amma heç kim yas saxlamır” - Sarkisyanın kürəkəni

  30 Noyabr 2020    Oxunub : 2207
“Minlərlə əsgərimiz öldü, amma heç kim yas saxlamır” -  Sarkisyanın kürəkəni
Ermənistanın Vatikandakı keçmiş səfiri, sabiq prezident Serj Sarkisyanın kürəkəni Mikael Minasyan baş nazir Nikol Paşinyanı və erməni xalqını Qarabağda ölən minlərlə əsgərə qarşı hörmətsizlikdə ittiham edib.
Azvision.az xəbər verir ki, keçmiş diplomat bütün dünyanın erməni xalqının necə aciz duruma düşdüyünü müşahidə etməsindən də söz açıb. Minasyan deyib: “Dünya anladı ki, biz döyülə, öldürülə bilərik və bir erməni bunu tez unuda, heç bir şey olmamış kimi davranaraq yaşamağa davam edə bilər. Məlum üçtərəfli sənədin imzalanmasından sonra 21 gün ərzində hər kəs öz işi ilə məşğul oldu. Nikol əsirlərlə məşğul olmalı idi. O, xalqa yalan söylədi və daha 21 gün hakimiyyəti əlində saxladı. Bu gün Ermənistanda daha alçaldıcı və qeyri-adi bir fenomen var. Öldürülən və itkin düşənlərin yaxınlarından başqa heç kim yas tutmur. Milli yas yoxdur. Matəm günü elan edilmədi. Minlərlə "qəhrəman" öldürüldü, yüzlərlə əsgər itkin düşdü, əsir düşdü və hələ də əsirlikdədir, minlərlə oğlanımız əlil oldu. Erməni xalqı qələbədən, məzarlarından və kilsələrdən uzaq qaldı. Bu bir adi fəlakət deyil, kosmik miqyasda faciəmizdir”.

Minasyan deyib ki, Nikolun qəsdən bir gün belə matəm elan etməməsi başa düşüləndir. Çünki bu ölüm və itkilər onun üçün faciə deyil:

“Sonradan ictimai tələb olmadığı zaman niyə elan edəsiniz ki? Nikol yas tutmur. Biz niyə yas tutmuruq? Paşinyan hər şeyin tez unudulmasını istəyir. Bəs ölkə? Ölkədə "Cümə" endirimləri marafonu var, restoranlar və mağazalar işləyir. Bayrağımız heç bir yerdə endirilməyib. Ermənistanın heç bir səfirliyində yas kitabı açılmayıb. Bilirsiniz niyə? Yas tutmaq üçün əvvəlcə nə baş verdiyini anlamaq lazımdır. Baş nazir bunu anlamır. Çünki bu onun üçün siyasi mübarizədir. O dəlidir və faciəmizi başa düşə bilməz. Bəs ölkədə hər kəs Nikoldurmu? Hələ heç kim faciənin dərinliyini tam anlamayıb?”.

Sarkisyanın kürəkəni onu da vurğulayıb ki, xalqın bu gün yas tutmamasının bir səbəbi reallığı qəbul etmək istəməməsidir. İnsanlar reallıqdan qaçırlar. Baş verənləri anlamamağa, eyni ətalətlə yaşamağa, eyni tələyə düşməyə çalışırlar:

“Hökumət, prezident, parlament yas saxlamalı idi. Bu qurumlar mövcud deyil. Dövlət yoxdur. Yəni heç olmasa sadə insanlar bunu etməlidirlər. 2018-ci ilin aprelində xalq bayraqlarla küçələrə çıxdı, qələbə barədə ucadan qışqırdı, hakimiyyət dəyişikliyini milli tətilə çevirdi. Eyni üslubda yas tutmaq üçün həmrəy olun. Bütün Ermənistan üç gün, bir həftə və ya bir ay lent bağlamalıdır. Bu gün yas tutmaq istəmədiyiniz aydındır. Bu, hər kəsin məsuliyyəti deməkdir”.

Tural Tağıyev
Azvision.az

Teqlər: Minasyan   Yas   Paşinyan