Ermənistanın vurduğu zərəri dəqiqləşdirmək üçün komissiyalar yaradılır

  31 Oktyabr 2020    Oxunub : 1874
  Ermənistanın vurduğu zərəri dəqiqləşdirmək üçün komissiyalar yaradılır
Sentyabrın 27-dən başlayaraq Ermənistanın hərbi-siyasi rəhbərliyinin göstərişi ilə düşmənin silahlı qüvvələri beynəlxalq hüququn norma və prinsiplərini, 1949-cu il tarixli Cenevrə konvensiyaları və onun Əlavə protokollarının müddəalarını kobud şəkildə pozaraq, Azərbaycan əhalisinin sıx yaşadığı məntəqələri ağır artilleriyadan atəşə tutur və bununla da mülki əhalimizə qarşı cinayətlər törətməyi davam etdirir. Hazırkı vaxtadək düşmən qüvvələri tərəfindən törədilən cinayətlər nəticəsində ümumilikdə 91 mülki şəxs həlak olub, 404 nəfər müxtəlif dərəcəli bədən xəsarətləri alıb. Yaralananların 43-nün vəziyyəti ağırdır. Bundan başqa, 2465 evə, 97 çoxmənzilli binaya və 455 mülki infrastruktur obyektinə külli miqdarda ziyan dəyib.
Azvision.az xəbər verir ki, bunu Baş Prokurorluğun mətbuat xidmətinin rəisi Günay Səlimzadə bildirib.

Onun sözlərinə görə, sentyabrın 27-dən indiyədək Ermənistan silahlı qüvvələri tərəfindən Azərbaycanın strateji obyektləri – Mingəçevir Su Elektrik Stansiyası və İstilik Stansiyası, Bakı-Tbilisi-Ceyhan və Bakı-Novorossiysk neft, Oğuz-Qəbələ-Bakı su kəmərləri, turizm mərkəzi olan Qəbələ rayonu da hədəfə alınıb. Bütün bu faktlara görə Ermənistan silahlı qüvvələrinin törətdiyi cinayət faktları üzrə Baş Prokurorluq tərəfindən Azərbaycan Respublikası Cinayət Məcəlləsinin müvafiq maddələrinə uyğun olaraq cinayət işləri başlanıb. Hazırda həmin cinayət işləri üzrə Baş Prokurorluğun İstintaq idarəsi tərəfindən istintaq aparılır.

Başlanmış və istintaq olunan cinayət işlərinin üç kateqoriyaya ayrıldığını vurğulayan G.Səlimzadə bildirib ki, birinci kateqoriyaya aid cinayət işləri Azərbaycanın cəbhə bölgəsindən kənarda yerləşən şəhər və rayonlarına vurulmuş ziyanla bağlıdır. İkinci kateqoriya üzrə cinayət işləri işğal altında qalan ərazilərimizdə qanunsuz iqtisadi fəaliyyətin aparılması, sonuncu kateqoriyadan olanlar isə işğaldan azad edilmiş və işğal altında qalan ərazilərimizdə tarixi abidələrimizin məhv edilməsi və ekologiya cinayətləri ilə bağlıdır. Hazırda hər cinayət işi üzrə prokurorluq əməkdaşları tərəfindən mümkün olan bütün istintaq tədbirləri, o cümlədən hadisə yerinə baxış keçirilir, dəymiş zərərin müəyyənləşdirilməsi üçün müvafiq ekspertizalar, o cümlədən məhkəmə-əmtəəşünaslıq ekspertizaları təyin olunur. Həmçinin zərərin məbləğinin dəqiqləşdirilməsi üçün müvafiq komissiyalar da yaradılır.

G.Səlimzadə, həmçinin vurğulayıb ki, Ermənistanın işğalçı və təcavüzkar mahiyyətinin beynəlxalq müstəvidə bir daha ifşa edilməsi məqsədilə prokurorluq orqanları tərəfindən mümkün olan bütün tədbirlər görülür, təqsirkar şəxslərin həm milli, həm beynəlxalq qanunvericiliyin tələblərinə əsasən, məsuliyyətə cəlb edilmələri və sanksiyaların tətbiq olunması məqsədilə mümkün olan bütün tədbirlər görülməklə beynəlxalq təşkilatlara müraciət ediləcək.

Azvision.az

Teqlər: Prokurorluq