"Torpaqlarımızı tam olaraq işğaldan azad edəcəyik" - Azay Quliyev

  27 Sentyabr 2020    Oxunub : 1253
   "Torpaqlarımızı tam olaraq işğaldan azad edəcəyik" -    Azay Quliyev
Bu gün səhər saatlarında Ermənistan silahlı qüvvələri Azərbaycana qarşı hücuma keçib və yeni ərazilərimizi işğal etmək məqsədilə hərbi obyektləri və mülki əhalini hədəfə alıb. Azərbaycan ordusu düşmənə ağır zərbələr vuraraq onu geri oturdub və bütün cəbhəboyu əks-hücuma keçib. Daxil olan məlumatlara görə, düşmən ordusu ciddi itki verərək geri çəkilir.
Azvision.az xəbər verir ki, bunu Milli Məclisin deputatı Azay Quliyev deyib.

Deputat bildirib ki, dövlətimiz, xalqımız və ordumuz üçün torpaqlarımızı tam olaraq işğaldan azad etməkdən ötrü tarixi şans yaranıb:

“Odur ki, ictimai təşkilatlardan, siyasi partiyalardan, mətbuatdan və bütövlükdə xalqımızdan asılı olan nədirsə, onu etməli və tarixi fürsəti qaçırmayaraq uzun müddət arzu etdiyimiz Qarabağın və ətraf rayonların işğaldan azad olunmasına nail olmalıyıq.

Bunun üçün:

1) Ali Baş Komandan və Ordumuzun ətrafında daha sıx və yumruq kimi birləşməliyik;

2) Xalq, millət və cəmiyyət olaraq hazırkı məsuliyyətli və tarixi dönəmdə Vətən naminə həmrəy olmalı, "hər şey cəbhə üçün, hər şey vətən üçün" devizi ilə yaşamalıyıq. Ayıq-sayıq olmalı və bütün sahələrdə düşmənin çeşidli təxribatlarını və panika yaymaq istəklərini vaxtında müəyyən edib qarşısını almalıyıq;

3) Cəbhəyanı rayonlarda yaşayan əhalimiz daha diqqətli olmalı və rəsmi məlumatlardan başqa heç bir xəbər və məlumatlara inanmamalıdır;

4) Ehtiyac olduğu təqdirdə hər birimiz yaşımızdan və tutuduğumuz vəzifədən asılı olmayaraq cəbhəyə getməyə, torpaqlarımızın işğaldan azad olunması uğrunda vuruşmağa hazır olmalıyıq.

Bizim işimiz haqq işidir, Vətən uğrunda apardığımız mücadilədir! Bu müqəddəs savaşda biz mütləq qalib gələcəyik! Torpaqlarımızı tam olaraq işğaldan azad edəcəyik! Allah Ordumuzu qorusun və müzəffər etsin!”.

Azvision.az

Teqlər: Azay-Quliyev