Onlayn narkotik satan daha bir nəfər tutuldu - FOTO

Onlayn narkotik satan daha bir nəfər tutuldu -  FOTO
  08 Aprel 2020    Oxunub:3520
Baş Narkotiklərlə Mübarizə İdarəsinin əməkdaşları tərəfindən həyata keçirilən növbəti uğurlu əməliyyat tədbiri nəticəsində ölkə ərazisinə gətirilən külli miqdarda yüksək təsiredici xassəyə malik narkotik vasitə və psixotrop maddələrin realizə edilməsinin qarşısı alınıb.
Daxili İşlər Nazirliyinin mətbuat xidmətindən Azvision.az -a bildirilib ki, Baş İdarəyə İrandan Azərbaycana narkotik vasitələrin keçirildiyi və narkotiklərin Tərlan adlı şəxs tərəfindən götürülərək satış məqsədilə respublikanın müxtəlif bölgələrinə aparılacağı barədə əməliyyat məlumatı daxil olub. Polis əməkdaşları tərəfindən dərhal həmin şəxsin tutulması istiqamətində zəruri əməliyyat tədbirləri həyata keçirilib. Peşəkarlıqla həyata keçirilən əməliyyat nəticəsində həmin şəxs, Lənkəran sakini Tərlan Əhədov Sumqayıt şəhərində saxlanılıb. Onun üzərində şəxsi axtarış aparılan zaman 137,114 qram heroin aşkarlanaraq götürülüb. Əməliyyat tədbirlərinin davamı olaraq onun Sumqayıt şəhərindəki evinə baxış zamanı 5 kiloqram 25 qram heroin, 800 ədəd metadon həbi, 365 qram tiryək, 89,482 qram metamfetamin, 1 ədəd “Falcon sport” markalı tapança və ona aid 7 ədəd patron aşkarlanaraq götürülüb.



Araşdırma zamanı müəyyənləşdirilib ki, Tərlan Əhədov İran vətəndaşı şəxsiyyəti istintaqa məlum olmayan “Əli” adlı şəxslə cinayət əlaqəsinə girərək külli miqdarda narkotik vasitələrin Azərbaycana gətirilməsini təmin edib. Həmin şəxslə “Whatsapp” ani mesajlaşma şəbəkəsi vasitəsilə əlaqə saxlayan T.Əhədov narkotik vasitələri əldə edəndən sonra İran vətəndaşının qeyd etdiyi yerlərə aparmalı imiş.



Qeyd edək ki, Tərlan Əhədov bir neçə dəfə həmin şəxs vasitəsilə bu yolla narkotik vasitələrin Azərbaycana gətirilməsində iştirak edib.

Faktla bağlı Cinayət Məcəlləsinin müvafiq maddələri ilə cinayət işi başlanılıb. Tərlan Əhədov barəsində məhkəmənin qərarı ilə həbs qətimkan tədbiri seçilib, əməliyyat tədbirləri davam etdirilir.

Azvision.az


Teqlər: DİN  





Xəbər lenti