Bakının İnkişaf Konsepsiyası hazırlanıb

  21 Fevral 2020    Oxunub : 1724
 Bakının İnkişaf Konsepsiyası hazırlanıb
Hazırda Bakı şəhərinin Baş Planının hazırlanması işinin ikinci mərhələsi həyata keçirilir.

Azvision.az xəbər verir ki, bunu Dövlət Şəhərsalma və Arxitektura Komitəsinin Şəhərsalma və ərazilərin inkişafı şöbəsinin müdiri Ramiz Babayev deyib. Şöbə müdiri bildirib ki, Bakı şəhərinin Baş Planı hazırlanır və müvafiq dövlət qurumları ilə birgə işçi komissiya yaradılıb:
"Həmin komissiyada ETSN ilə əməkdaşlıq edilir. Baş Planla bağlı qeyd etmək lazımdır ki, iş artıq ikinci mərhələdədir. Birinci mərhələdə 4 prioritetdən ibarət Bakının İnkişaf Konsepsiyası hazırlanıb. Həmin prioritetlərdən biri də şəhər və ətraf mühitin regenerasiyası, ərazilərdən səmərəli istifadə və əhalinin rahat yaşayışının təmin edilməsidir".

R.Babayev qeyd edib ki, ikinci mərhələdə Baş Planın yekun layihəsi hazırlanır: "Layihə bu ilin sonunadək müvafiq qurumlarla razılaşdırıldıqdan sonra Nazirlər Kabinetinə təqdim ediləcək. Bu mərhələdə də ETSN ilə əməkdaşlığı davam etdiririk".

Şöbə müdiri, həmçinin əlavə edib ki, beynəlxalq təcrübəyə əsasən, şəhərlərdə yaşıllıq örtüyü əhalinin sayı və məskunlaşma ərazisinə görə müəyyən edilir.

"Bu gün ETSN tərəfindən hazırlanan yaşıllıq sahələrinə nəzarət edilməsi üçün elektron və vizual məlumat bazası Baş Planın hazırlanmasında faydalı olacaq. Belə ki, Bakının inkişaf perspektivində yaşıllıq ərazilərinin genişləndirilməsinə xüsusi diqqət yetiriləcək".

Aytən Zəhra
Azvision.az

Teqlər: Başplan   Bakı