Gələn ilin büdcəsi 5 komitənin iclasında müzakirə olunub

Gələn ilin büdcəsi 5 komitənin iclasında müzakirə olunub
  07 Noyabr 2019    Oxunub:1438
Bu gün Milli Məclisin İnsan hüquqları, Regional məsələlər, Hüquq siyasəti və dövlət quruculuğu, Beynəlxalq münasibətlər və parlamentlərarası əlaqələr, Gənclər və idman komitələrinin birgə iclası keçirilib.
Azvision.az xəbər verir ki, iclası Milli Məclis sədrinin müavini, İnsan hüquqları komitəsinin sədri Bahar Muradova açıb.

O, "2020-ci ilin dövlət büdcəsi haqqında” qanun layihəsinin müzakirələrinin parlamentin komitələrində bir neçə gündür davam etdirildiyini bildirib. Deputat qeyd edib ki, sənəd reallıqlara, dövlətin qarşısında dayanan hədəflərə, insanların sosial vəziyyətinin yaxşılaşdırılmasına və təhlükəsizliyinin təmin olunmasına cavab verəcək formada hazırlanıb. Vitse-spiker budcə layihəsinin başlıca iqtisadi sənəd olaraq 2020-ci ildə həyatımızın müxtəlif istiqamətlərini əhatə edəcəyini, dünya və ölkə iqtisadiyyatında gözlənilən meyllərin təhlilinə uyğun hazırlandığını vurğulayıb. O, həmçinin diqqətə çatdırıb ki, 2020-ci ilin büdcəsi Azərbaycanın müstəqillik tarixində ən irihəcmli büdcədir. Bu da onu sübut edir ki, büdcə gəlirləri qarşıdakı ildə bütün sahələr üzrə nəzərdə tutulan islahatların reallaşmasına imkan verəcək, əhaliyə ödənişlərin miqdarı artacaq.

Gələn ilin büdcəsinin əsas parametrləri barədə məlumat verən Maliyyə naziri Samir Şərifov bildirib ki, 2020-ci il və ortamüddətli dövrdə Azərbaycanın milli iqtisadiyyatının başlıca sektorları üzrə Strateji Yol Xəritələrinin icrası, o cümlədən dövlət büdcəsinin vəsaiti hesabına həyata keçirilməsi nəzərdə tutulmuş dövlət proqramlarının və tədbirlərinin maliyyələşdirilməsi üzrə tədbirlər büdcə xərclərinin əsas istiqamətlərindən biri olacaq.

Gələn il üçün Ümumu Daxili Məhsulun real iqtisadi artımı 3%, qeyri-neft sektorundan gələn artımlar isə 3,8% proqnozlaşdırılır. Büdcənin ənənəvi olaraq sosialyönümlülüyü təmin ediləcək. 2020-ci ilin dövlət büdcəsinin gəlirləri 24,134 milyard manat təşkil edəcək. Bunun 10,605 milyard manatı, yəni 43,9%-i qeyri-neft sektoru üzrə daxilolmaların, 13,53 milyard manatı, yəni 56,1%-i isə neft gəlirlərinin payına düşəcək. Vergi orqanlarının xətti ilə büdcəyə 7,875 milyard manat, gömrük orqanlarının xətti ilə isə 4 milyard manat daxilolmalar proqnozlaşdırılır. Növbəti ildə Azərbaycan Dövlət Neft Fondundan büdcəyə 11,35 milyard manat transfer nəzərdə tutulur.

Büdcənin xərcləri isə 26,914 milyard manat təşkil edəcək. Bunun 17,276 milyard manatı cari xərclər, 7,81 milyard manatı əsaslı xərclər, 1,828 milyard manatı isə dövlət borcuna xidmətlə bağlı xərclər olacaq.

Nazir bildirib ki, bu illə müqayisədə növbəti ildə elm xərclərinə 42,1%, təhsil xərclərinə 38,3%, səhiyyə xərclərinə 31,3%, sosial müdafiə və sosial təminat xərclərinə 31,1%, mədəniyyət, informasiya, bədən tərbiyəsi və gənclər siyasətinə 29,3%, müdafiə və hüquq mühafizə orqanlarının saxlanması xərclərinə 22,5% çox vəsait nəzərdə tutulub. Dövlət büdcəsinin 10,21 milyard manatı konkret proqram və tədbirlərin maliyyələşdirilməsinə yönəldiləcək. Müdafiə və təhlükəsizliyin təmin edilməsi, məhkəmə hakimiyyəti, o cümlədən hüquq mühafizə orqanları, prokurorluğun saxlanması xərcləri üçün 5,827 milyard anat vəsaitin ayrılması nəzərdə tutulur. Hərbi qulluqçuların mənzillə təmin olunması, əhalinin güzəştli şəkildə mənzil əldə edilməsi, ipoteka kreditləri ilə dəstəklənən məsələlərə də maliyyənin ayrılması nəzərdə tutulub. Bu tədbirlərin maliyyələşdirilməsi üçün 245 milyon manat vəsait ayrılacaq.

İclasda iştirak edən Hesablama Palatasının sədri Vüqar Gülməmmədov çıxışında vurğulayıb ki, 2020-ci il dövlət büdcəsi layihəsi yeni vahid büdcə təsnifatına əsasən tərtib edilmiş ilk büdcədir. Növbəti ildən qüvvədə olacaq təsnifat dövlət maliyyəsinin beynəlxalq metodologiyaya uyğunlaşması istiqamətində uğurlu addımlardan biridir. Onun sözlərinə görə növbəti il həm mərkəzləşmiş, həm də yerli gəlirlərdə artım proqnozlaşdırılır. Hesablama Palatası tərəfindən hazırlanan rəydə büdcə layihəsinin icrası ilə bağlı 30-a yaxın tövsiyə verilib.

Müzakirələr zamanı çıxış edən Milli Məclisin Regional məsələlər komitəsinin sədri Arif Rəhimzadə bildirib ki, gələn ilin büdcəsində bələdiyyələrə ayrılan vəsait artıb. Ölkəmizdə 1 606 bələdiyyənin olduğunu deyən komitə sədrinin sözlərinə görə, bələdiyyələrə büdcədən vəsait ayrılarkən həmin ərazilərdə yaşayan əhalinin sayı nəzərə alınmır. Yəni bələdiyyələrə eyni həcmdə vəsait verilir. Ona görə də bəzi bələdiyyələr çətinliklər yaşayırlar. Əgər dotasiyalar artırılarsa, bələdiyyələrin problemləri aradan qaldırıla bilər.

Parlamentin Beynəlxalq münasibətlər və parlamentlərarası əlaqələr komitəsinin sədri Səməd Seyidov xaricdə erməni lobbisini dəstəkləyən qüvvələrin Azərbaycana qarşı hücumlarının sayının artdığını deyib. Komitə sədri onların susdurulması istiqamətində görüləcək işlərdən, xarici ölkələrə səfərlərin sayının artırılmalı olduğundan danışıb. Bu sahədə xərclərin artırılmasına zərurət olduğunu vurğulayıb.

Deputatlardan Məlahət İbrahimqızı, Qüdrət Həsənquliyev, Qənirə Paşayeva, Tahir Kərimli, Çingiz Qənizadə, Flora Qasımova, Sona Əliyeva, Nəsib Məhəməliyev, Hikmət Məmmədov çıxış edərək fikir və təkliflərini səsləndiriblər.

Müzakirələr zamanı İnsan Hüquqları üzrə Müvəkkil Elmira Süleymanova da müxtəlif təkliflərlə çıxış edib. Ombudsmanın fikrincə, ölkədə zorakılıq qurbanları olmuş qadınlar üçün regional mərkəzlər tikilməsinə, bununla bağlı sosial çarxlar, maarifləndirici proqramların hazırlanmasına ehtiyac var. Həmçinin ölkədə mövcud olan psixatriya mərkəzlərinin yenidən qurulması və yenilərinin tikilməsi, tələbə yataqxanalarının inşa olunması zərurəti yaranıb.

Müzakirələr yekunlaşdıqdan sonra Maliyyə naziri Samir Şərifov, Əmək və Əhalinin Sosial Müdafiəsi naziri Sahil Babayev, İqtisadiyyat nazirinin müavini Sevinc Həsənova və Hesablama Palatasının sədri Vüqar Gülməmmədov səslənən sual və təklifləri cavablandırıblar.

Deputatlar “2020-ci il dövlət büdcəsi haqqında” qanun layihəsinin Milli Məclisin plenar iclasına tövsiyə olunmasına müsbət münasibət bildiriblər.

Azvision.az


Teqlər: MilliMəclis   Büdcə   Komitə  





Xəbər lenti