Şavarş Köçəryanın Xankəndidəki çıxışına XİN-dən sərt reaksiya

 Şavarş Köçəryanın Xankəndidəki çıxışına XİN-dən sərt reaksiya
  12 Oktyabr 2019    Oxunub:2347
Azərbaycan Respublikasının Xarici İşlər Nazirliyinin mətbuat katibi Leyla Abdullayeva Ermənistanın xarici işlər nazirinin müavini Şavarş Köçəryanın Xankəndidə keçirilən forumda söylədiklərinə münasibət bildirib.
Azvision.az xəbər verir ki, XİN rəsmisi açıqlamasında deyib:

“Ermənistan xarici işlər nazirinin müavini öz yalanları ilə erməni xalqını aldatmaqla məşğuldur. Onun beynəlxalq hüququn “xalqların öz müqəddəratını müəyyən etməsi” prinsipini Azərbaycanın Dağlıq Qarabağ bölgəsində yaşayan erməni icmasının Ermənistan Respublikasının təcavüzkar əməlləri ilə dəstəklənən qanunsuz zorakı separatçılıq cəhdləri ilə eyniləşdirməsi tarixi saxtalaşdırmaq və hüquq prinsiplərini yalan əsasında yozmaq deməkdir. Hüquq isə yalanı sevmir və beynəlxalq hüquq prinsiplərinin əks olunduğu sənədlər kifayət qədər açıq dildə və aydın şəkildə yazılıb. Əgər Ş.Köçəryanın BMT Nizamnaməsindən, BMT TŞ qətnamələrindən, ATƏT-in Helsinki Yekun Aktından, eləcə də sovet dövründə qanunsuz separatçı meyillərlə bağlı SSRİ Ali Sovetinin qəbul etdiyi qərarlardan xəbəri yoxdursa, o zaman Ermənistan xarici işlər nazirinin müavininə yalnız təəssüf etmək olar.

Ermənistanın Azərbaycana qarşı təcavüzü çərçivəsində hazırlanaraq həyata keçirilən və məhkəmə qərarı ilə təqsirkar bilinən 92 nəfər arasında ermənilərin olduğu Sumqayıt hadisələrinin təhrif edilməsi onu göstərir ki, növbəti dəfə Ermənistan tərəfi öz məsuliyyətini başqasının üzərinə atmağa cəhd edir. Bu gün bölgədəki cari vəziyyətin, Azərbaycanın beynəlxalq tanınmış ərazilərinin beşdə birinin hərbi işğal altında olmasının, bir milyondan çox azərbaycanlının qaçqın və məcburi köçkün vəziyyətində olmasının yeganə səbəbi Ermənistanın dövlət səviyyəsində həyata keçirdiyi təcavüzkar və ilhaqçı siyasətdir. Münaqişənin həlli üzrə danışıqlar ATƏT-in Minsk qrupunun həmsədrlərinin vasitəçiliyi ilə Ermənistan və Azərbaycan arasında aparılır və aparılan danışıqların əsas prinsipləri və mahiyyəti dəfələrlə həmsədr ölkələri tərəfindən ifadə edilib. Ş.Köçəryanın münaqişənin mahiyyətini və danışıqlar prosesini mənasız və əsassız şəkildə təhrif etməsi cəhdi ucuz erməni təbliğatından başqa bir şey deyildir".

Azvision.az


Teqlər: XİN   Leyla-Abdullayeva   Qarabağ  





Xəbər lenti