Bahar Muradova: “Normal siyasətçi ilə üz-üzə olmaq istəyirik”

Bahar Muradova: “Normal siyasətçi ilə üz-üzə olmaq istəyirik”
  03 Oktyabr 2018    Oxunub:2849
“Ermənistanın baş naziri Nikol Paşinyanın istefasının tələb olunacağı öncədən də bəlli idi. Paşinyanın baş nazir seçilməsi prosesini yada salsaq, söyləmək lazımdır ki, bu, nə bugünkü parlamentin, nə hökumət orqanlarının, nə də Ermənistanda hakimiyyətdə olan siyasi qüvvələrin marağında idi. Onun baş nazir seçilməsi problemləri aradan qaldırmayıb, əksinə daha da dərinləşdirib”
AzVision.az xəbər verir ki, bunu jurnalistlərə açıqlamasında Milli Məclis sədrinin müavini Bahar Muradova deyib. Vitse-spiker bildirib ki, bu da özünü ölkə daxilində gedən proseslərdə qabarıq şəkildə göstərir.

“Siyasətdə səriştə, vərdiş, diplomatik gedişlərə malik olmaq siyasətçi üçün vacib məsələdir. Paşinyanın bu imkanları aşağı səviyyədədir. Odur ki, Paşinyandan narazı qüvvələrin revanş götürmək istəkləri olacaq. Ermənistanda narazı siyasi qüvvələr ölkədəki durumu gərginləşdirməklə əvvəlki imkanlarını geri qaytarmaq niyyətindədirlər, onlar bu mübarizədə imkanlarını Paşinyana qurban vermək niyyətində deyillər. Bu münasibətlər gərginləşməyə doğru gedəcək”.

B.Muradova qeyd edib ki, biz Ermənistan tərəfində Dağlıq Qarabağ probleminin həlli üçün adekvat təmsilçi görmək niyyətindəyik.

“Hansı siyasi qüvvənin hakimiyyətdə olması onların daxili işidir, amma kimin olmasından asılı olmayaraq, Dağlıq Qarabağ məsələsində adekvat danışıq tərəfi kimi normal siyasətçi ilə üz-üzə olmaq istəyirik”.

Anar Kəlbiyev
AzVision.az


Teqlər: Bahar-Muradova   Ermənistan  





Xəbər lenti