AzVision.az xəbər verir ki, bu barədə Gürcüstanın Birinci telekanalı məlumat yayıb.

Metronun girişində iri plakat yerləşdirilib və əhalidən xahiş olunur ki, metro işləmədiyindən avtobuslardan istifadə etsinlər. Həmçinin qeyd olunub ki, metroda çalışan maşinistlər tezliklə aclıq aksiyasına başlayacaqlar. Lakin bundan əvvəl metro işçilərinin tətil keçirməsinə qəzəblənən Tbilisi şəhər meri Kaxa Kaladze bildirmişdi ki, onlar kifayət qədər yüksək maaş alırlar.

Tbilisi metropolitenində təqribən 240 maşinist işləyir və onların hamısı maaşlarının saatda 7 laridən 10 lariyə qaldırlmasını tələb edirlər.

Qeyd edək ki, artıq 4 gündür Tbilisidə kütləvi etiraz aksiyaları keçirilir. Güc strukturlarının müdaxiləsi nəticəsində aksiya iştirakçılari ilə toqquşmalar yaşanıb. Nəticədə polis bir neçə nümayişçini saxlayıb. Aksiyalara səbəbsə qətlə yetirilmiş iki yeniyetmənin işi üzrə istintaqın qeyri-obyektiv aparılmasıdır. Etirazçıların fikrincə, ölkədə prokurorluq və məhkəmə orqanları korrupsiyalaşıb. Bunun günahkarı isə indiki hakimiyyətdir. Odur ki, aksiya iştirakçıları baş nazir Georgi Kvirikaşvilinin istefasını və hakimiyyətin dəyişməsini tələb edirlər.

Qeyd edək ki, 2017-ci il dekabrın 1-də Tbilisinin Xortava küçəsində 51 nömrəli məktəbin iki şagirdi aldıqları bıçaq yarasından dünyalarını dəyişib. Məhkəmə şagirdləri qətlə yetirən iki nəfərdən birini azadlığa buraxıb, digərinin cinayət işində maddələri dəyişərək ona yüngül cəza verib. Ölən şagirdlərin valideynləri bunda prokurorluq orqanlarını günahkar sayaraq aksiyaya başlayıblar. Baş prokuror ittihamlara və aksiya iştirakçılarının tələbinə uyğun olaraq istefa verib.

Leyla Elbrusqızı
AzVision.az