Deputatdan onu təhqir edənlərə cavab: "Tutaq ki, səhv eləmişəm..."

Deputatdan onu təhqir edənlərə cavab: "Tutaq ki, səhv eləmişəm..."
  30 Mart 2018    Oxunub:26881
Milli Məclisin deputatı Musa Quliyev onu sosial şəbəkələrdə təhqir edənlərə cavab verib.

AzVision.az xəbər verir ki, deputat "Facebook" səhifəsində geniş açıqlama yararaq, fikirlərinin yalnış anlaşıldığını söyləyib.
Məlumat üçün bildirək ki, dünən Sabunçu rayonu ərazisində küçə süpürən qadını avtomobil vuraraq öldürüb. Hadisə yerindən çəkilən foto və məlum hadisə sosial mediada geniş müzakirə edilib. Hadisə ilə bağlı deputatın KİV-ə verdiyi açıqlama birmənalı qarşılanmayıb. Bu səbəbdən onu tənqid, hətta təhqir ediblər.

Qeyd etdiyimiz məsələ ilə bağlı açıqlama yayan deputat fikirlərinin təhrif olunduğunu bildirib: "Ha dedim, cavab verməyim, ötüb keçər, yəqin sadəcə yanlış anlaşılmadır, olmadı. Ailəsindən başqa tanınıb oxunmayan saytlardan tutmuş sosial şəbəkə qeybətçilərinədək, millətin bir yaralı barmağına məlhəm olacaq qədər dəyəri olmayan vətənşivənlərədək hamısı ağız- ağıza verib mənim təhrif olunmuş, kontekstdən çıxarılmış bir fikrimi çeynəməklə məşğuldular. Fikir söykəmək də, onu müzakirə etmək də qəbahət deyil. Amma bu müzakirə deyil axı, söyməkdir, təhqir etməkdir. Belə şeylərə ehtiyac yoxdur.Bu cür davranış milli mənəviyyatımızı dağıtmaqdır.

Gəlirəm məsələnin məğzinə: Jurnalist zəng vurub açıqlama istəyir. Vicdanli yazarlar hamısı etiraf edər ki, mən həmişə mətbuata açıq olmuşam. İqtidar, bitərəf, müxalif mövqeyindən asılı olmayaraq bütün jurnalistlərə sahəm üzrə müsahibələr, açıqlamalar vermişəm. Zatən millət vəkilinin bir işi də budur".

Deputat, daha sonra qeyd edib: "Sabunçu rayonu ərazisində yol qəza hadisəsi ilə bağlı jurnalist xanım məndən soruşub ki, Əmək Məcəlləsində bəzi vəzifələlərə 65 yaş məhdudiyyəti qoyulduğu halda, pensiya yaşında olan qadına niyə süpürgəçi işləmək qadağan olunmur? Mən də qanunu şərh edərək bildirmişəm ki, büdcədən maliyyələşən bəzi təşkilatlarda çalışan peşə sahibləri - müəllimlər, həkimlər, mədəniyyət işçiləri, mühəndislər və s. istisna olmaqla digər peşələrdə işləmək üçün yaş məhdudiyyəti qoyulmur. Xüsusən, təmizlik sahəsi, iaşə, xidmət sektoru, yaşıllaşdırma, fəhlə və s. kimi xüsusi ixtisas tələb etməyən və əmək bazarında ciddi rəqabət olmayan sahələrdə yaş məhdudiyyəti yoxdur. Pensiyaya çıxdıqdan sonra da əgər sağmamlığı imkan verirsə, bu şəxslər öz işlərində qalıb işləyə bilərlər. Əgər pensiyaya çıxmaq istəyirlərsə onları heç kəs məcburi işlədə bilməz.

Hələ jurnalist qızımıza onu da söyləmişəm ki, belə qəzalar hər yerdə olur və hər kəsin başına gələ bilər. Biz müzakirələrimizdə əsas diqqəti əmək təhlükəsizliyi və yol- hərəkət qaydalarına riayət etməyin vacibliyinə yönəltməliyik.

Vicdanla söyləyin: mənim bu açıqlamamda qanundan, etikadan kənar nə var ki, hər kəs kor baltasını götürüb üstümə qıcanır? Bu düşüncə ilə, bu mədəniyyətlə, bu savadsızlıqla biz hara geririk? Fəlsəfə İnstitutunun bir elmi işçisi isə lap gül vurub: "Musa Quliyevin mandatı əlindən alınmalıdır". Ay sənin savadına xoruz kəsim! Bir Konstitusiyanı aç oxu da, alim oğlum, dediyi sözə görə mandatmı alınar deputatdan? Bu da Akademiya!

Bu əlibaltalı nadanlar da axı mənim millətimdir? Lap tutaq ki, səhv eləmişəm, sizin ürəyiniz istəyəni deməmişəm, buna görə adamı təhqir eləyərlərmi? Axı müsahibənin lap kontekstdən çıxarılmış mətnini də oxumamısınız, bir başlığa görə adamın başını qoparıb yeyərlərmi? Bu münasibətə nə ad verək: nadanlıqmı, namərdlikmi? Siz heç olmazsa balalarınıza da belə tərbiyə və öyüd veməyin. Allah hamımızın yardımçısı olsun!!".

AzVision.az


Teqlər: Musa-Quliyev  





Xəbər lenti