Oqtay Əsədov oyunu izlədi - Deputatlar 3 qol vurdular

Oqtay Əsədov oyunu izlədi - Deputatlar 3 qol vurdular
  10 Mart 2018    Oxunub:2056
Martın 9-da Milli Məclisin 100 illik yubileyinə həsr olunan parlament komandalararası beynəlxalq futbol turnirinə start verilib.
Milli Məclisdən AzVision.az-a verilən məlumata görə, “İnter Arena”da keçirilən ilk oyunda Azərbaycan və Latviya komandaları qarşılaşıblar. Oyunun gedişini Milli Məclisin sədri Oqtay Əsədov, Sədrin birinci müavini Ziyafət Əsgərov, nümayəndə heyətlərinin üzvləri və digər rəsmi şəxslər izləyiblər.

Komandalar hər biri 30 dəqiqədən ibarət iki hissədə mübarizə aparıblar. Azərbaycan-Latviya qarşılaşmasından əvvəl hər iki ölkənin dövlət himnləri səsləndirilib. Oyuna fəal başlayan Azərbaycan komandası rəqib qapısı qarşısında dəfələrlə təhlükəli vəziyyətlər yaradıb. Görüşdə hesab 28-ci dəqiqədə açılıb. İlk hissə komandamızın 1:0 hesablı üstünlüyü ilə başa çatıb. İkinci hissəyə çox fəal başlayan Azərbaycan komandası üstünlüyünü daha da artırıb. Beləliklə, görüş 3:0 hesabı ilə komandamızın xeyrinə yekunlaşıb.

Günün ikinci oyununda Türkiyə və Polşa komandaları üz-üzə gəliblər. Görüşə fəal başlayan Türkiyə təmsilçiləri qalib gəliblər. Görüş 5:1 hesablı qələbə ilə Türkiyə komandasının xeyrinə nəticələnib.

Xatırladırıq ki, turnirdə Azərbaycan Milli Məclisinin, Türkiyə Böyük Millət Məclisinin, Ukrayna Ali Radasının, Polşa və Latviya seymlərinin komandaları yarışırlar.

AzVision.az


Teqlər: Futbol   MM   Deputat  





Xəbər lenti